Hokkeı. Kanada – álem chempıony!

ASTANA. 18 mamyr. Hokkeıden Chehııada ótken álem chempıonaty máresine jetti. Fınalda Reseıdi 6:1 esebimen tas-talqan etip jeńgen Kanada 25-shi ret álem chempıony atandy. Bul týraly egemen.kz habarlady. Kanada – Reseı 6:1 (1:0, 3:0, 2:1) Goldar: Kodı Ikın 19, Taıler Ennıs 22, Sıdnı Krosbı 28, Taıler Segın 29, Klod Jırý 49, Natan Makkınson 50 – Evgenıı Malkın 53. Chehııa astanasy – Pragadaǵy «O2-Arena» muz aıdynynda ótken kezdesýge 17 383 jankúıer jınaldy. Oıynnyń alǵashqy kezeńi teń dárejede órbidi. Úziliske 1 mınýt qalǵan kezde esep ashqan kanadalyqtar ekinshi kezeńde oıynǵa tolyq baqylaý júrgizdi. Tipti matchtyń bul bóliginde Reseı hokkeıshileri tek aıdynnan qýylýymen ǵana este qaldy. Sheshýshi kezeńde de qarqynyn joǵaltpaǵan soltústikamerıkalyqtar sońǵy sekýndtarǵa deıin belsendilik tanytty. Nátıjesinde Reseı chempıondyq ataǵyn qorǵaı almady. Oıyn barysynda Kanada quramasy 37 soqqy jasasa, Reseı hokkeıshileri 12 ret qarsylastar qaqpasyn nysanaǵa aldy. Aıyp ýaqyty boıynsha da Soltústik Amerıka ókilderiniń nátıjesi úzdik (4 - 10). Bul Kanadanyń 37-fınaly. Sonyń 25-inde álem chempıony ataǵyna qol jetkizgen. Degenmen, olar 2009 jyldan beri «altyn» turmaq, júldege de ilige almaı keldi. Sol jyly álemdik dodanyń kúmis júldesine qol jetkizgen Kanada ótken jyly 5-oryn alǵan bolatyn. Osy oıyndy qosa eseptegende eki qurama álem chempıonatynyń fınalynda 3 ret kezdesti. Ázirge jalpy esep Reseıdiń paıdasyna 2:1. Al jalpy, álemdik doda barysynda qos qarsylas 16 márte kúsh synasqan. Bul rette jeńiske jetý kórsetkishi boıynsha esep teń (8:8). KSRO kezindegi oıyndardy qosqanda Reseı úshin de bul 37-shi fınal bolǵanyn aıta keteıik. Sonyń 27-sinde chempıon atanǵan orystar 10 márte kúmis júldemen shektelgen. Elaman Qońyr. Derek: egemen.kz. Sýret: eurosport.ru.