Taldyqorǵan turǵyn úımen tolyǵa túsedi

Shanhaı yntymaqtastyq uıy­mynyń nátıjeli jumysynyń bir kórinisi – Qazaqstan Respýblıkasy men QHR arasyndaǵy saýda-sattyq, jalpy ekonomıkalyq baılanys jyldan-jylǵa ulǵaıyp keledi. Mem­lekettik mańyzy bar bul ju­mysqa aımaqtar da belsendi atsalysýda. Jýyrda Almaty oblystyq kásipkerler palatasynda QHR-dyń Shansı aımaǵynan kelgen arnaıy delegasııamen Taldyqorǵan qalasynyń ákimi Ermek Alpysov kezdesip, qos tarapqa tıimdi jobalardy talqylady. «Xing Huo» korporasııasynyń ókilderi qala basshylyǵymen kezdesýi barysynda aspan asty eli óńirdiń agrarlyq salasyn damytýǵa qyzyǵýshylyq tanytatyndyǵyn aıtyp, bul maqsatty oryndaýǵa Jetisý jeri taptyrmas ólke bolyp tabylatyndyǵyn jetkizdi. Sonymen qatar, ózge salalarǵa da ınvestısııa salýdy josparlaǵan qonaqtar Taldyqorǵannyń qazirgi tynysy jaıly málimet surady. О́z kezeginde qala ákimi Ermek Alpysov Shansı aımaǵynyń ókilderi qolǵa almaq bolyp otyrǵan «Innovasııalyq aýylsharýashylyq parkin» oblys ortalyǵynda turǵyzý ózge aýdandardaǵydaı logıstıkalyq jáne taǵy basqa shyǵyndaryn azaıtyp, jobanyń keń aýqym alyp, ónimniń ózindik qunynyń tómendeýine sep bolatyndyǵyn jetkizdi. Onyń ústine qala áýejaıy aldaǵy ýaqytta júk tasymaldaýshy ushaqtardy qabyldaý múmkindigine ıe bolatyndyǵyn da aıtqan qala basshysy kelissózge kelgen ınvestorlardyń qyzyǵýshylyǵyn týǵyzdy. Sonymen birge, oblys ortalyǵynyń jańadan boı kótergen Ońtústik-batys aýdanynda turǵyn úı salý jaıyn talqylaǵan qos tarap, búginde kóp qabatty turǵyn úılerdiń jobalyq-smetalyq qujattary men jobalary ýaqytty únemdep, salynǵan qarjynyń qaıtarymyn jyldamdatyp, qarjyny únemdeýge bolatyndyǵyn aıtty. Qala ákiminiń úshinshi usynysy oblys basshylyǵynyń qoldaýymen ınfraqurylymy jańartylyp jatqan «Shyǵys» ındýstrııalyq aımaǵynda qant zaýytyn salý boldy. Taldyqorǵannyń logıstıkalyq múmkindikterin eskersek, bul ınvestorlarǵa utymdy usynys. Toǵyz joldyń toraby, júk tasymaldaýshy ushaqtardy qabyldaıtyn áýejaı, temirjol taǵy bar. Onyń ústine búginde Elbasy tapsyrmasyna sáıkes Almaty oblysynda qant qyzylshasynyń alqaptaryn ulǵaıtý jumysy júıeli túrde júrgizilip jatqandyqtan shıkizat ta tapshy bolmaıdy. Kelissózder aıaqtalysymen qos tarap yntymaqtastyq týraly memorandýmǵa qol qoıyp, qolǵa alynar jobalardy aldaǵy ýaqytta taǵy da tereńirek zerttep, eki jaqqa da tıimdi joldy qarastyratyndyǵyn aıtyp ýaǵdalasty. Nurbol ÁLDIBAEV, «Egemen Qazaqstan». Taldyqorǵan.