Keden kodeksiniń negizgi sharttary

Keshe Ortalyq kommýnıkasııalar qyzmetinde Qarjy vıse-mınıstri Ardaq Teńgebaev, Memlekettik kiris komıteti kedendik rásimder departamentiniń dırektory Dına Mamasheva jáne Ádilet mınıstrliginiń Ekonomıkalyq ıntegrasııa jáne jobalardy saraptaý departamenti dırektorynyń orynbasary Ásem Qorǵasbekova baspasóz máslıhatyn ótkizdi. Onda Eýrazııalyq ekonomıkalyq odaq aıasynda áreket etetin Keden kodeksiniń negizgi baptary sóz boldy. Qazaqstan, Reseı jáne Belarýs arasyndaǵy Eýrazııalyq ekonomıkalyq odaq týraly shart aǵymdaǵy jyldyń 1 qańtarynan bastap kúshine engeni málim. Shartta ekonomıkanyń ártúrli salalary, onyń ishinde kedendik retteý, salyqtar men salyq salý týraly erejeler qamtylǵan. Integrasııanyń birinshi kezeńi Keden odaǵynyń Keden kodeksin engizý jolymen úsh eldiń kedendik júıelerin jaqyndatý bolatyn. «Eýrazııalyq ekonomıkalyq komıssııa alańynda EAEO-nyń keden kodeksi ázirlendi. Ol bıznes-qaýymdastyqtyń tikeleı qatysýymen daıyndalǵan jobada úsh memlekettiń 16 halyqaralyq kelisiminiń normalary engizildi. Onyń negizgi úsh ereksheligi bar. Birinshisi – elektrondy qujat aınalymyna baǵdarlanǵan, elektrondy deklarasııalaýǵa basym­dyq beriledi. Ekinshisi – deklarasııa­lardy tirkeýge jáne taýarlardy shyǵarýǵa baılanysty keden­dik operasııalardy keden organ­darynyń zańdy tulǵalary qatys­pastan, aqparattyq júıelerge avtomatty túrde engizýge múmkindik jasalady. Úshinshisi – negizge alyp toltyrylǵan qujattardy usynbastan, deklarasııany elektrondy túrde tapsyrýǵa bolady», dedi vıse-mınıstr. Spıker ekonomıkalyq odaq­qa múshe memleketterdiń salyq salý salasyndaǵy ózara is-qı­myl­darynyń qaǵıdattary ekono­mıkalyq odaq týraly sharttyń «Salyqtar jáne salyq salý» bóli­minde kózdelgenin de táptishtep aıtyp ótti. «Naqtylap aıtar bolsaq, odaqqa múshe bir memlekettiń aýmaǵynan ekinshi memlekettiń aýmaǵyna ákelinetin taýarlarǵa janama salyq salynatyn bolady. Máselen, ekonomıkalyq odaq sheńberinde janama salyqtardy salý salyq organdaryna 2010 jyly berildi. Taǵy bir ishki zańnamaǵa engizilgen jańalyqty aıtar bolsaq, úshinshi memleketterden taýar ımporty kezinde kedendik tazartý rásimin jeńildetý maqsatynda iri salyq tóleýshiler úshin janama salyqtardy tóleý kedendik resimdeý kezinen bas­tap bir jarym aıǵa deıingi merzimde júzege asyrylady. Bul syrtqy ekonomıkalyq qyzmet qatysýshylarynyń aınalymdyq qarajatyn únemdeıdi. Sondaı-aq, osy jyldyń 1 qańtarynan bastap engizilgen taǵy bir jańalyqqa toqtalar bolsam, taýarlardyń eksport, ımportyn rastaıtyn negizgi qujat bolyp tabylatyn taýarlardy ákelý jáne janama salyqtardy tóleý týraly ótinish ekonomıkalyq odaq sheńberinde elektrondy túrde tapsyrylatyn bolady. Bul rette atalǵan ótinishtiń qoldanystaǵy qaǵaz júzinde jáne elektrondy túrde tapsyrý tártibi saqtalǵan», dedi A.Teńgebaev. Brıfıngte Eýrazııalyq ekonomıkalyq odaq aıasyndaǵy barlyq sheshimderi «bir el – bir daýys» qaǵıdasymen, erikti túrde qabyldanatyndyǵy atap aıtyldy.  Negizi, kez kelgen memlekettiń turaqty damýy basqa memlekettermen ıntegrasııasyna baılanysty ekendigin eskersek, osy sebeppen álemniń kóptegen aımaqtarynda ıntegrasııalyq úderister damyp jatqany belgili. Sonymen qatar, álemdegi eń damyǵan 30 eldiń qataryna kiretin elder aımaqtyq jáne jahandyq ekonomıkalyq birlestikterdiń eń belsendi qatysýshylary bolyp tabylady. Osyny aıtqan Á.Qorǵasbekova «Eýrazııalyq ekonomıkalyq odaq organdarynyń barlyq sheshimderi «bir el – bir daýys» qaǵıdasymen, erikti negizde qabyldanady. Qaısybir memleket kelispegen jaǵdaıda sheshim qabyldanbaıdy», dedi. Nurbaı ELMURATOV, «Egemen Qazaqstan».