Qazaqstandyq áskerı teńizshiler «Qazaqstan», «Oral», jáne «Saryarqa» zymyrandy-artıllerııalyq kemeleriniń jaýyngerlik múmkindikterin synady. Sonyń aıasynda Kaspıı teńizinde QR QK Áskerı-teńiz kúshteriniń aýqymdy jattyǵýy ótti.
Artıllerııalyq kemeler sý ústinen áýege baǵyttalǵan jáne sý asty mınalaryn zalalsyzdandyrý jattyǵýlaryn synady. Jınaqylyqqa erekshe kóńil bólgen Ekıpaj músheleri jattyǵýlardy joǵarǵy dáldikpen oryndady. Dál osyndaı tapsyrmalardy áskerı teńizshiler bıyl jazda ótetin «Kaspıı teńizi-2015» baıqaýynda qaıtalaıtyn bolady.
Atalǵan jarysta bizdiń áskerı qyzmetshilerimizdiń naǵyz qarsylasy Túrkimenstan, Reseı jáne Ázerbaıjan teńiz jaıaý áskerleriniń úzdik teńizshileri men bólimsheleri bolmaq. Osyny eskere otyryp, qazaqstandyq áskerı kemelerdiń ekıpajdary men teńiz jaıaý áskerleriniń bólimsheleri teńiz bıatlonynyń barlyq baǵyttarynda belsendi daıarlyq ótkizýde.
Búgingi kúni olar teńiz jaǵasynda jáne sý jolyndaǵy qaýipter arqyly júzýdi, kemedegi ıakordy 30-40 metr tereńdikte ornatý, MSS-65 halyqaralyq jıyn dabylyna sáıkes jaryq jáne jalaý arqyly belgi berý jáne qabyldaý, sondaı-aq, bortta qalyp qoıǵan adamdy qutqarý boıynsha sharalardy pysyqtady.
«Egemen-aqparat».
