Qyzylordada mektep túlekterine avtosherý jasaýǵa tyıym salyndy

QYZYLORDA. 19 mamyr. Oblys ákimi Qyrymbek Kósherbaev apparat májilisinde bıyl mektep bitirýshi túlekterdiń avtosherý uıymdastyrýyna qatań tyıym salý kerektigi jaıynda bilim jáne ishki ister salalarynyń basshylaryna tapsyrma berdi. Bul týraly egemen.kz tilshisi habarlady. Osy jyly oblys kóleminde 291 bilim uıasynan 6 myńnan asa oqýshy mektep bitiredi. Olar sońǵy qońyraý keshinde meıramhanalarda otyrystar ótkizip, avtosherý uıymdastyrýdy dástúrge aınaldyrǵan. Mektep bitirýshiler úshin úlken mánge ıe sońǵy qońyraý, ulttyq biryńǵaı test sııaqty naýqandar sońǵy jyldary ata-analardyń qaltasyna salmaq túsiretini jasyryn emes. Degenmen, qaltasy kótermeıtin ata-analar da bar. Osyǵan baılanysty oblys ákimi Qyrymbek Kósherbaev keleńsiz jaǵdaılardy boldyrmaý, áleýmettik tepe-teńdikti saqtaý basty mindet ekenin atap ótti. Sondaı-aq, Qyrymbek Eleýuly: «Mektep – oqýshy esinde aqsha jınaý orny emes, bolashaqqa joldama beretin bilim ordasy retinde saqtalýy qajet. Sońǵy qońyraý básekege toly sán jármeńkesi men qaýip qaterge toly avtokólik jarystaryna, beımezgil ýaqyttaǵy quqyq buzýshylyq oshaǵyna aınalmaýy kerek. Árbir oqýshy ata-anasynyń baılyǵymen, laýazymymen emes, óziniń bilimimen, talabymen, bolashaqqa talpynysymen maqtanatyn bolsyn»,– dedi. Áleýmettik teńdikti saqtap, qaýipsizdik sharalaryn qolǵa alý maqsatynda bıyl avtosherýlerge, retsiz qarajat jınaýǵa tyıym salynbaq. Ol úshin barlyq jaýapty organdarga tıisti tapsyrmalar berildi. Erjan Baıtiles. Derek: egemen.kz. Sýret: youtube.com.