Batys Qazaqstanda ındýstrııalyq aımaqqa 1 myń gektar jer bólindi

ORAL. 5 naýryz. Batys Qazaqstan oblysy ákimdigi men túrkııalyq «Akkıýn grýpp» kompanııasy arasynda ındýstrııalyq aımaq qurý jónindegi memorandýmǵa qol qoıyldy. Bul traly egemen.kz tilshisi habarlady. Atalǵan kompanııa basshysy Iýsýf Akkıýnnyń aıtýynsha, olardyń qalaýlary Oral óńirine tekten tek túspepti. «Bizdi birinshiden Batys Qazaqstannyń logıstıka men ınfraqurylym jaǵynan qolaılylyǵy qyzyqtyrdy», deıdi ol. Endeshe oblystyq ákimdik úshin túrkııalyqtar nesimen tartymdy boldy degen saýalǵa da jaýap bere ketkenimiz jón. Bul rette sheteldik kompanııanyń ındýstrııalyq aımaq qurýdaǵy mol tájirıbesi eskerilgenin aıtýǵa tıispiz. Olar álemniń kóptegen elderinde jumystar júrgizýde. Indýstrııalyq aımaqtyń qajettiligi – shaǵyn jáne orta kásipti órkendetýge asa qolaıly faktor týǵyzatyndyǵynda. Budan ári óndiristiń kez-kelgen salasyn damytýǵa jan-jaqty múmkindikter ashylmaq. Búgingi kúni Qazaq-Túrik ındýstrııalyq aımaǵyn qurý úshin Samara-Shymkent tasjoly boıynan 1 myń gektar jer telimi bólingen. Mundaǵy qurylys jumystary alǵashqy kezeńde 300 gektar aýmaqqa ǵana júrgizilmek. Budan keıingi kezekte qalǵan jer telimi bólikteri kásipkerler men ınvestorlardyń suranystaryna saı odan ári ulǵaımaq. Eń bastysy, búginde qol qoıýshy taraptar jobanyń barynsha tıimdi túrde, ári qysqa merzimde iske asýyna múddeli. Qazirgi kúni munda ındýstrııalyq aımaqtyń tehnıkalyq-ekonomıkalyq negizdemesi men jobalaý-smetalyq qujattaryn jasaý isi belgilenip otyr. Temir Qusaıyn. Derek, sýret: egemen.kz.