ASTANA. 19 mamyr. Astanada Qazaqstannyń BAQ ókilderi arasynda shaǵyn fýtboldan kórnekti qoǵam qaıratkeri, jazýshy, belgili sport jýrnalısi Seıdahmet Berdiqulovty eske alýǵa arnalǵan respýblıkalyq týrnır ótti. Bul týraly ulttyq shtattyq komandalar jáne sport rezervi dıreksııasynyń baspasóz qyzmeti habarlady.
Dodany Mádenıet jáne sport mınıstrligi sport jáne dene shynyqtyrý isteri komıteti uıymdastyrdy. «Astana-Arena» stadıonynda ótken týrnırge 16 komanda qatysty. Jarys qorytyndysy boıynsha, 1-oryndy «Almaty» telearnasy jeńip aldy. 2-oryn «Habar» (Almaty) telearnasyna buıyrsa, úzdik úshtikti «Aqmeshit» (Qyzylorda) komandasy túıindedi.
Jeńimpaz jáne júldeger komandalarǵa medaldar, kýboktar jáne baǵaly syılyqtar tabys etildi. Sondaı-aq, erekshe oıynymen kózge túsken oıynshylar ártúrli nomınasııalar boıynsha marapattaldy. Odan bólek, tóreshiler jáne jarystyń ótýine zor úles qosqan mekemeler men azamattar da nazardan tys qalmady.
Jarysqa qatysqan sport jáne dene shynyqtyrý isteri komıtetiniń tóraǵasy Elsııar Qanaǵatov mundaı dodanyń buqaralyq sporttyń damýyna oń yqpalyn tıgizetinin aıtty. Týrnırge Seıdahmet Berdiqulovtyń otbasy Almatydan arnaıy kelip qatysty.
Uıymdastyrý komıteti týrnırdiń ótýine atsalysqan jazýshynyń uly Zańǵar Berdiqulovqa, ulttyq shtattyq komandalar jáne sport dıreksııasynyń dırektory Qaıyrgeldi Janpeıisovke, Qajymuqan Muńaıtpasov atyndaǵy respýblıkalyq daryndy balalarǵa arnalǵan sporttyq ınternat-kolledjdiń dırektory Serik Tókıevke, Astana qalasy sport jáne dene shynyqtyrý basqarmasy bastyǵynyń orynbasary Samat Qabdýllınge, «Art Prınt XXI» fırmasyna, sondaı-aq, «Astana-Arena» stadıonynyń ákimshiligine zor alǵysyn bildiredi.
Atalǵan týrnır 1995 jyldan beri BAQ ókilderi arasynda turaqty ótkizilip kele jatqanyn aıta keteıik.
Elaman Qońyr.
Derek, sýret: Ulttyq shtattyq komandalar jáne sport rezervi dıreksııasynyń baspasóz qyzmeti.
