Petropavlda paramen sottalǵan sheneýniktiń týystary mıtıng ótkizdi

PETROPAVL. 19 mamyr. Para aldy degen kúdikpen tutqyndalyp, túrmege toǵytylǵan basqarma basshysynyń týǵan-týystary oblys ortalyǵynda qarsylyq mıtıngisin ótkizdi. Bul týraly KTK telearnasy habarlady. Olar Petropavldyń ákimdiginen jıyn ótkizýge zańdy ruqsat alǵannan keıin osyndaı uıǵarymǵa kelipti.  Buǵan deıin jıyn-sherýler uıymdastyrýǵa kelisim berip kórmegen ákimdiktiń bul qadamy sheneýnik jazyqty emes degen oıdy quptaǵandaı seziledi.     Oblystyq qurylys basqarmasynyń burynǵy basshysy Ratmır Ýsmanov Mamlıýtka qalasynda turatyn kásipker Murat Horsıevten 10 myń dollar bopsalaǵany úshin 6 jylǵa sottalǵan bolatyn.   M. Horsıev te 4 jyl merzimge jazaǵa kesilgen. Alaıda, ekeýi de sot úkimimen kelispeı joǵarǵy ınstansııaǵa shaǵym túsirdi. Endigi úmitteri – kassasııalyq sot. Sóz arasynda osy qylmystyq is boıynsha oblystyq, aýdandyq deńgeıdegi birqatar laýazymdy tulǵalar jaýapkershilikke tartylyp, oblystyń ákimi men qurylys isterine jaýapty orynbasary qyzmetterinen alastatylǵanyn aıta ketken jón. «Qarjy polısııasy meniń ulymnyń sózi jazylǵan taspany montajdaǵan. Saldarynan aqshany qaryzǵa aldym degen sózderdiń bári óshirilgen. Bizde dosyńnan qaryz alǵanyń úshin de sottaıdy. Bul – baryp turǵan ádiletsizdik!», deıdi Ratmırdyń anasy Sýfııa Ýsmanova. О́mir Esqalı. Derek: KTK telearnasy. Sýret: egemen.kz