5315 bozdaqtyń esimi jazylǵan memorıal

Uly Jeńistiń 70 jyldyq mereıtoıy qarsańynda Kúrshim aýdanynyń ortalyǵynda Dańq me­morıaly ashyldy. Otan qor­ǵaý­­­­­shy kúni saltanatty túrde ash­ylǵan eskertkishtiń elimiz­de ba­lamasy joq deýge bolady.

– Bıyl Elbasy Nursultan Nazarbaevtyń tapsyrmasy bo­ıynsha Uly Jeńistiń 70 jyl­dyq mereıtoıy elimizdiń bar­lyq óńirlerinde erekshe atap ótilýde. Shyǵys óńiri de merekeni joǵary deńgeıde qarsy aldy. Jalpy, Shyǵys Qazaqstannan 170 myńnan asa adam maıdanǵa alynyp, olardyń arasynan erligimen tarıhqa engen 109 Keńes Odaǵynyń Batyry, 22 Dańq ordeniniń tolyq kavaleri shyqty. Bul – elimiz ben óńirimiz­diń batyrlyǵy men qaharman­dyǵynyń kórinisi. Altaıdyń temiri men qorǵanysy jaýǵa oq bolyp atylsa, Altaıdyń jas óren­deri qaısar jaýynger bolyp qan maıdanda shaıqasty. Janqııarlyqpen jaýǵa atoılap qarsy turǵan bozdaqtarymyzdyń rýhyna taǵzym etý úshin Kúrshim aýylynda Dańq memorıaly boı kóterdi. Bizge bul eskertkish tarıhtan tálim alý, keleshek býyndy otanshyldyq rýhta tárbıeleý úshin kerek, – dedi oblys ákiminiń orynbasary Jaqsylyq Omar. Kúrshim aýdanynyń ákimi Altaıbek Seıitovtiń aıtýynsha, Kúrshim-Marqa óńirinen so­ǵystyń aldyńǵy shebine 9456-dan astam azamat attanǵan eken. Onyń ishinde 2462 jaýynger habar-osharsyz ketse, 2853 sarbaz maı­danda opat bolǵan. Minekeı, osy­ Uly Otan soǵysynan qaıt­paǵan 5315 bozdaqtyń esimi jańa­dan boı kótergen Dańq memorıalynyń qabyrǵalaryna gabbro mármárǵa oıylyp jazyldy. Qurylystyń jalpy quny 65 mln. teńgeni qurady. 5 gektar jerge ornalasqan keshen aýmaǵy eki sektordan turady. Iаǵnı, memorıal aýmaǵy halyqtyń seıildeýine de qolaıly oryn sanalady. Sektordyń bir jaǵyna gúlzar, sýburqaq, oryndyqtar men alleıa oryn tepken. Al ekinshi jaǵy – taǵ­zym alańy. Qos qanattyń dál orta­synda kókke shanshylǵan tórt qyrly stela bar. Dúnıeniń tórt bu­ryshy uǵymyn beretin stelanyń uzyndyǵy 18 metr, aýdany 1,29 gektardy quraıdy. Ushar basyndaǵy juldyzdyń nyshany dástúrli dinı nanymdar boıynsha tirshilik ataýly men o dúnıedegi keńistiktiń baılanysyn jetkizedi. Qurmet taqtasynda qan maıdanda qaza tapqan jaýyngerlerdiń aty-jónderinen bólek Kúrshim aýdanynan shyqqan Keńes Odaǵynyń Batyrlary, Sosıalıstik Eńbek Erleri, Qazaqstannyń Eńbek Eri, joǵary áskerı jáne memlekettik qyzmette bolǵan qaıratkerler men tulǵalardyń esimderi kórinis tapqan. Keshenniń mańdaıynda «Esh­kim de ólgenderdi tiriltýge qudiretsiz, degenmen de olardy máńgi este saqtaý – bizdiń qasıet­ti paryzymyz» degen Elbasy Nursultan Nazarbaevtyń sózi oıyp jazylypty. Aqyn Syrbaı Máýlenovtiń soǵys qasiretin beınelegen jyry da eskertkishtiń mánin asha túsken. – О́mir boıy biri ákesin, biri atasyn, biri asyl jaryn kút­ken aǵa urpaqtyń qasireti qaıtalanbasyn, – desti saltanatty sharaǵa ortaqtasqan kúrshimdik soǵys ardagerleri Ahmedkárim Ahmadıev, Júnisqalı Ihıev. Dýman ANASh, «Egemen Qazaqstan». Shyǵys Qazaqstan oblysy, Kúrshim aýdany.