Qostanaıdaǵy mektepke Ǵafý Qaıyrbekovtyń esimi berildi

QOSTANAI. 21 mamyr. Qazaqstan Úkimetiniń qaýlysymen Qostanaı qalasyndaǵy №9 orta mektepke kórnekti aqyn, jazýshy Ǵafý Qaıyrbekovtyń esimi berildi. Bul týraly egemen.kz tilshisi habarlady. Qostanaı qalasynda uzyn, basty kóshelerdiń biri de qazaq poezııasyndaǵy dúldúl aqyn Ǵafý Qaıyrbekovtyń esimimen atalady. Osy kósheniń boıynda ornalasqan №9 qazaq orta mektebin de aqynnyń jary Bádesh Hamzına men jergilikti zııaly qaýym ókilderi aqynnyń atyna surap júrgen bolatyn. Ǵafý ózi: «Qaıda júrsem, seni esimnen tastamaı, О́tip ketti jaqsy jyl men jas talaı. Meniń atym saǵynysh bop ózgerdi, Saǵynyshqa qolyńdy ber, Qostanaı!» dep jyrlaǵan týǵan jerinde kóshe men mektep tutas ansambl quryp turǵanyn qalaǵan edi. Biraz kúttirgen jyldardan keıin aqyn jyrlaryna tánti halqynyń tileýi oryndaldy. Aqynnyń jary Bádesh Hamzına: «Týǵan jeri azamatyn, aqynyn syılap, bilim oshaǵyna Ǵafekeńniń atyn bergenine rızamyn. Mektep oqýshylary atasynyń atyna kir keltirmeı, bilimdi azamat bolsyn», dedi.  Saltanatty is-sharada Qostanaı qalasy ákiminiń orynbasary M.Qalıev, aqyndar A.Shaıahmet, S.Ospanov, N.Muqatov, jazýshy-satırık Ǵ.Ahmetchın, til janashyry Q.Ormanov, Jankeldın aýdany ákiminiń ekonomıka jónindegi orynbasary D.Serikuly, №9 orta mektep dırektory Á.Moldahalyqov jáne oblystyq tilderdi damytý basqarmasynyń ókilderi qatysyp, jyly lebizderin bildirdi. Osy sharaǵa oraı mektepte aqynǵa arnalǵan ádebı kesh ótti. Mektepte Bádesh apaıdyń bastamasymen jáne onyń izdenýimen, kómegimen Ǵafýdyń mýzeıi jasaqtalǵan edi. Keshke qatysýshylar osy mýzeıdi aralap kórdi, bilim oshaǵynyń ónerli balalary qoıǵan konsertti tamashalady. Názıra Járimbetova. Derek, sýret: egemen.kz