Oqý jylynyń sońynda «Astana» ýnıversıtetinde shý shyqty

ASTANA. 21 mamyr. Astanadaǵy «Astana» ýnıversıtetinde oqý jylynyń sońynda shý shyqty. Atalǵan bilim ordasynda oqý aqysy 2 esege qymbattap, stýdentterdiń áleýmettik jaǵdaıyna keri áserin tıgizdi. Osy keleńsizdikke baılanysty ýnıversıtettiń 15 stýdenti oqý ornynyń basshylyǵynan bolǵan jaıttyń sebebin túsindirýdi surady. Alaıda, rektorat naqty jaýap bergen joq. Bul týrly informburo.kz habarlady. Osyǵan oraı bıyl oqýyn aıaqtaıtyn stýdentter «dıplomdarymyz qolymyzǵa tımeı qalady» dep qaýiptenýde. Al máseleniń aq-qarasyn anyqtamaq bolǵan olardy kúzet qyzmeti ýnıversıtet ǵımaratyna jibergen joq. «Oqý jylynyń sońynda, dál memlekettik emtıhan aldynda bizge oqý aqysynyń qymbattaǵanyn habarlady. Osyǵan deıingi 3 kýrs boıy 150-170 myń teńgeden tólep keldik. Al endi 450 myń teńge talap etýde. Eger bul somany tólemesek, bizdi memlekettik emtıhandarǵa jibermeıdi», – deıdi qazaq tili jáne ádebıeti fakýltetiniń stýdenti Ádilet Jumadiláev. Ádilettiń kýrstasy Álııa Aıtýardyń aıtýynsha, óz quqyqtaryn talap etken stýdentter oqý ornynyń rektorymen kezdese almaı júr. Bul másele jóninde ol: «Bizge ne úshin qosymsha aqsha tóleýimiz kerek ekenin eshkim naqty túsindirmedi. Kelisimshart boıynsha oqý aqysy ózgergen joq», – dep, narazylyǵyn bildirdi. О́z kezeginde ýnıversıtet rektorynyń mindetin atqarýshy О́rik Imanǵojına eshqandaı oqý aqysynyń óspegenin aıtty. Alaıda, lezde bul sózinen aınyǵan ol mundaı qadamǵa baqylaý organdarynyń tapsyrmasy boıynsha barǵanyn jáne barlyǵy memlekettik standarttarǵa saı ekenin jetkizdi. Degenmen, naqty qandaı standarttar ekenin atap bere almady. «Búgingi tańda baǵany eshkim ósirgen joq. Bizge oqý aqysyn memlekettik talaptarǵa saı deńgeıge jetkizý týraly prokýratýra organdarynan tapsyrma keldi. Úkimettiń bekitken memlekettik normatıvteri bar. Bul talaptarǵa bizdiń oqý orny saı kelmeıdi», – degen Imanǵojına naqty esh nárseni túsindirip bere almady. Sonymen qatar, ol: «Stýdentterimizdiń basym bóligi aýyldan kelgender. Oqý ornyndaǵy barlyq stýdentterge jeńildik qarastyrylady. Sondaı-aq, biz muǵalimderge arnalǵan 6 qabatty jataqhana saldyq», – dep, oqý aqysynyń qymbattaý sebebin túsindirmek boldy. Basshylyqtyń mundaı jaýaby sońǵy kýrs stýdentterin qanaǵattandyrǵan joq. Olar bul jaıtty ádiletsiz dep sanaıdy. Elaman Qońyr. Derek, sýret: informburo.kz.