TARAZ. 3 shilde. Jumys naýqanynyń alǵashqy kúnderi Jambyl oblysynda 12 myńnan astam gektar alqaptyń egini orylyp, masaqty daqyldyń túsimdiligi 8,1 sentnerdi qurady. Bul týraly egemen.kz tilshisi habarlady.
Oblys sharýalarynyń basty mindeti -- el yrysyn ysyrapsyz jınap alý bolyp tur. Oblystyq aýyl sharýashylyǵy basqarmasy basshysynyń mindetin atqarýshy Beıbitbek Jaılybaevtyń aıtýyna qaraǵanda, bıyl oblysta aýyl sharýashylyǵy daqyldarynyń egis alqaptary 557 000 gektardy qurap, ótken jyldyń josparymen salystyrǵanda 12 400 gektarǵa ulǵaıǵan. Oblys boıynsha 237 500 gektar masaqty dándi daqyldar oraqqa túsedi dep josparlanyp otyr. Onyń 103 900 gektary kúzdik bıdaı bolsa, 132 900 gektary jazdyq masaqty daqyldar.
«Eńbek etpeseń, elge ókpeleme, egin ekpeseń, jerge ókpeleme» degen, búginde Jambylda altyn dánniń arqasynda dáýletin asyryp, asyǵy alshysynan túsip otyrǵan sharýashylyqtar jeterlik. Bıyl osy óńirdegi Jambyl aýdanynda 6 myń gektar kúzdik bıdaı orylady. Berekeli tirlikteriniń arqasynda tabystaryn eselep júrgen osy aýdandaǵy «Pıoner», «Qyzyl dıqan», «Ereke», «Amangeldi» sharýashylyqtarynyń dıqandary naýqandy bastap ta ketti. Jambyl oblysynyń ákimi Kárim Kókirekbaev Allanyń bergen rızyǵyn tókpeı-shashpaı jınap alý úshin ár aýdannan osy naýqanǵa jaýapty komıssııa qurýdy tapsyrdy.
Qalaı aıtsaq ta, bıylǵy jyl nesibesin jerden tergen aýyl adamdaryna mol berekesin syılap-aq tur. Laıym, qambamyz dánge, dalamyz ánge tola bersin!
Oralhan Dáýit.
Derek, sýret: egemen.kz.
