Qazaqstan Respýblıkasy Prezıdenti janyndaǵy Memlekettik basqarý akademııasy memlekettik tildi oqytýdy jetildirýdiń jaıyna jetkilikti kóńil bóle bastady. Osyǵan oraı munda memlekettik organdarda memlekettik tildi oqytýdy jetildirý máselelerin talqylaǵan respýblıkalyq ǵylymı-ádistemelik keńes bolyp ótti.
Atalǵan is-sharaǵa Prezıdent Ákimshiliginiń, Prezıdenttiń is basqarmasynyń, esep komıtetiniń, tilderdi damytý jáne qoǵamdyq-saıası jumys komıtetiniń, Memlekettik qyzmet isteri jáne sybaılas jemqorlyqqa qarsy is-qımyl agenttiginiń, Ádilet, Ulttyq ekonomıka, Densaýlyq saqtaý jáne áleýmettik damý mınıstrlikteriniń ǵylymı-ádistemelik keńesiniń músheleri men memlekettik tilge qatysy bar mamandary qatysty.
Keńes tóraǵasy, akademııa rektory Bolatbek Ábdirasılov óziniń kirispe sózinde talqylanyp otyrǵan máseleniń mańyzdylyǵy men memlekettik qyzmetshilerdi oqytýdyń mazmuny men tehnologııalaryn birizdi baǵytta júrgizýdiń ózektiligin atap ótti.
Akademııanyń aýdarma jáne memlekettik tildi oqytý ortalyǵynyń jetekshisi, professor N.Tólenbergenova óz baıandamasynda 2011-2014 jyldar aralyǵynda memlekettik organdarda qazaq tilin oqytqan til ortalyqtardyń oqytý ádistemeleri sapasyna monıtorıng júıesi arqyly toqtalyp, atalǵan baǵyttaǵy ózekti problemalardy atap kórsetti. Sonymen qatar, akademııanyń resmı stıldi oqytý tájirıbesine jalpylama sıpat bere kelip, tıptik baǵdarlamaǵa kirgen 6 semınardyń baǵyty men baǵdaryna sholý jasap ótti. Al atalmysh semınarlar resmı qazaq tili jáne resmı mátinge daıyndyq, resmı jazylym jáne memlekettik tilde is qaǵazdaryn júrgizý, qujattama jasaý, qujattamany basqarý jáne memlekettik tilde is qaǵazdaryn júrgizý, personaldy basqarý jáne memlekettik tilde is qaǵazdaryn júrgizý, sóz mádenıeti jáne sheshendik óner, memlekettik qyzmetshiniń tildik quzyrettiligi taqyryptaryn qamtıdy. Baıandamashy óz sózinde tildi úıretý tehnologııasyna toqtala otyryp, «Resmı qazaq tili» – Ofısıalnyı kazahskıı ıazyk semınarlarynyń tıptik baǵdarlamasyn usyndy.
Keńes jumysyna Prezıdent Ákimshiligi Jalpy bólim redaksııalyq saraptama jáne aktilerdi shyǵarý sektorynyń meńgerýshisi Bekzada Saǵyn, memlekettik qyzmet isteri jáne sybaılas jemqorlyqqa qarsy is-qımyl agenttigi memlekettik qyzmetti ótkerý basqarmasynyń bas ınspektory Alma Quljanbekova, Mádenıet jáne sport mınıstrligi tilderdi damytý jáne qoǵamdyq-saıası jumys komıteti til saıasatyn taldaý jáne monıtrıng basqarmasynyń basshysy Tolqyn Isaqova, respýblıkalyq bıýdjettiń atqarylýyn baqylaý jónindegi esep komıteti ákimshilik jáne qarjy bólimi memlekettik tildi damytý sektorynyń meńgerýshisi Farıda Saqypova, Ádilet mınıstrligi ishki ákimshilik departamenti memlekettik tildi damytý jáne aýdarma basqarmasynyń basshysy A.Tóleýhanova, Ulttyq ekonomıka mınıstrligi memlekettik tildi damytý jáne redaksııalaý basqarmasynyń basshysy G.Qısyqova belsene qatysty. Sóıleýshiler talqylanyp otyrǵan máseleniń ózektiligi jaıly aıtyp, tıptik baǵdarlamany joǵary baǵalady, akademııanyń memlekettik qyzmetshilerdiń tildik biliktiligi men quzyrettiligin birizdi tıptik baǵdarlama arqyly kóterý týraly usynysyn qoldaıtyndary jaıly baıandady.
Is-sharaǵa onlaın rejimi arqyly keńes músheleri, atap aıtqanda, óńirlik qaıta daıarlaý men biliktilikti arttyrý ortalyqtarynyń dırektorlary: Jambyl oblysynan Dúısenbek Ábdiraıymov, Aqmola oblysynan Álibek Baımaǵambetov jáne Aqtóbe oblysynan Aleksandr Dýbovenko aralasty.
Keńes músheleri men qatysýshylar elimizdiń barlyq ortalyǵy men óńirleriniń memlekettik qyzmetshilerin oqytý júıesine engiziletin «Resmı qazaq tili – Ofısıalnyı kazahskıı ıazyk» taqyrybyndaǵy memlekettik qyzmetshilerdiń tildik biliktiligin arttyratyn semınarlardyń tıptik baǵdarlamasyn bekitti.
Serik PIRNAZAR,
«Egemen Qazaqstan».
