Teńge baǵamy aldaǵy aptada onsha ózgermeıdi

Jańa aqsha-nesıe saıasaty jaıyndaǵy áńgime keshe Prezıdent janyndaǵy Ortalyq kommýnıkasııalar qyzmetinde  ótken kezekti baspasóz máslıhatynda jalǵasyn tapty. Bul jolǵy brıfıngke Ulttyq bank ókilderi qatysyp, teńge baǵamynyń ózgerýine oraı bank tarapynan qolǵa alynǵan sharalardy tilge tıek etti. «20 tamyzdan bastap Ulttyq bank jańa aqsha-nesıe saıasatyn qolǵa aldy. Jańa nesıe saıasatynyń, ıaǵnı, ınflıasııalyq targetteýdiń máni – ınflıasııa­ny kózdeý saıasatyna kóshý. Inflıasııany kózdeý saıasatyna kóshý barysynda teńge baǵamyn bos jiberdik. Teńge baǵamy alǵashqy kúnderden bastap bir dollar úshin 255-258 teńge, qazir 239-241 teńge aralaǵynda tur. Inflıasııany kózdeý saıasatynyń negizgi máni – 2020 jylǵa deıin baǵany turaqtandyrý. Baǵany turaqtandyryp, qymbattaýǵa jol bermeý úshin 2020 jylǵa deıin jyldyq ınflıasııany 3-4 paıyzǵa deıin túsirýdi kózdep otyrmyz», dedi baspasóz máslıhatynda Ulttyq banktiń memlekettik organdarmen jumysty úılestirý jónindegi departamenti dırektory Baqytjan Sáreev. Teńge baǵamy ózgergennen beri valıýta aıyrbastaý pýnktterinde birshama qarbalas beleń ala bastaǵan edi. Mundaı sátte árkim óz betinshe «aqsha jasap» qalǵysy keletini anyq. Alaıda, memlekettik organdar ondaı keleńsizdikterge jol bergisi joq. Máselen, elordada valıýta aıyrbastaý operasııasynyń tártibin buzǵandar qatań baqylaýda tur. Bul týraly Ulttyq banktiń Astana qalasy boıynsha ortalyq fılıalynyń dırektory Ǵazız Shegenov málim etti. «Teńgeniń erkin aınalymy engizilgen soń, Ulttyq bank valıýta aıyrbastaý pýnktteriniń jumysyn qadaǵalaýdy kúsheıtti. Astana qalasy boıynsha málimet beretin bolsam, biz valıýta aıyrbastaý operasııasynyń tártibin buzǵan 7 aıyrbastaý pýnktin anyqtadyq. Osy 7 faktige qatysty úsh aıyrbastaý pýnktine jazbasha túrde eskertý jarııalansa, eki fakti bo­ıynsha talapty oryndaý mindeti bekitildi, al bir banktiń fılıalyna qatysty ákimshilik quqyq buzýshylyq týraly hattama toltyryldy. Ol fılıal dollar men eýronyń kýrsyna qatysty baǵany qymbattatyp satqan», dep túsindirdi Ǵ.Shegenov. Ol sondaı-aq, oraıy kelgen sátti paıdalanyp, valıýta aıyrbastaý pýnktterine qatysty Ulttyq banktiń quqyqtary men quzyryn qaıtalap ótti. Iаǵnı, valıýta baǵamyn rettemese de, valıýta aıyrbastaý pýnktteriniń qyzmetin retteýge quqyly ekendikterin eske saldy. «Ulttyq bankten valıýta aıyrbastaýǵa ruqsat alyp, lısenzııa ıelengen uıymdarǵa qatysty oryndap jatqan mindetteri týraly hat suratýǵa, jazbasha túrde eskertý jarııalaýǵa jáne oryndaýǵa mindetti jazbasha túrde eskertý berýge quqyly. Sonymen qatar, Ulttyq bank valıýta aıyrbas­taý tártibin buzǵan pýnktterdiń lısenzııasyn qaıtaryp alýǵa da qaýqarly», dep eskertti Ǵ.Shegenov. Brıfıng barysynda sondaı-aq, qazirgi kúni halyq arasynda talqylaý týdyrǵan «demalys kúnderi dollardyń teńgege shaqqandaǵy quny kúrt ósedi eken» degen alyp-qashpa áńgimege oraı da Ulttyq bank ókilderi túsinikteme berip ótti. Bul rette bankırler halyqty demalys kúnderi dollar baǵasyna alańdamaýǵa shaqyrdy. Sebebi, valıýta aıyrbastaý pýnktteri valıýta baǵamyn tek jumys kúnderi jáne jumys ýaqyty kezinde, saǵat keshki 18.00-ge deıin ǵana belgileı alady. «О́tken aptadan bastap Ulttyq bank barlyq óńirlerge tıisti qarajatty jetkizdi. Bizdiń esepteýimizshe, qarajat 1,5 aılyq muqtajdyqty óteýge jetedi. Iаǵnı, óńirlerdegi aıyrbastaý pýnktterinde dollar bolsyn, teńge bolsyn jetkilikti. Sonymen qatar, aqsha aıyrbas­taý pýnktterine qoıylatyn negizgi talap – olar valıýta baǵamyn tek jumys kúnderi jáne jumys ýaqyty kezinde ǵana belgileýleri kerek. Al demalys kúnderge arnalǵan dollar baǵamyn aptanyń juma kúni belgileýi kerek jáne ony demalys kúnderi ózgerte almaıdy, dep naqtylady ol. Al Ulttyq bank basqarma tóraǵasynyń orynbasary Nurlan Qusaıynov qyrkúıek aıynyń basynda dollardyń teńgege shaqqandaǵy baǵasy qatty qymbattap nemese qatty arzandap ketedi degen boljamnyń joqtyǵyn aıtty. «Qazaqstandyqtar, mereke kúnderinde teńgeniń tómen kýrsyn izdep alańdamańyzdar. Qazir 240 teńgeden sál qymbat kýrs bir apta boıy turaqty jáne boljamdy kýrs bolmaq. Qyrkúıek aıynyń basynda teńgeniń dollarǵa shaqqandaǵy kýrsy ne tym qymbattap, ne tym arzandap ketpeıdi», dedi N.Qusaıynov. Teńge baǵamynyń tómendeýine oraı halyq kóńilin kúpti etken taǵy bir másele teńgemen saqtaǵan depozıtter jaıy bolatyn. Osyǵan oraı, jýrnalıster qoıǵan suraqqa qatysty Ulttyq bank ókilderi teńgemen ashqan depozıtterdiń shyǵynyn óteý baǵdarlamasy aldaǵy qyrkúıekte bekitiletinin jetkizdi. Bul týraly brıfıngte Ulttyq banktiń qarjylyq qyzmetti tutynýshylar quqyǵyn qorǵaý jónindegi departament dırektory Aleksandr Terentev aıtyp berdi. «Memleket basshysy teńgeniń erkin aınalymǵa túsýine baılanysty depozıtteri teńgemen ashylǵan halyqqa shyǵyndaryn ótep berý týraly tapsyrma bergen. Prezıdenttiń tapsyrmasyna sáıkes, 1 mıllıonǵa deıingi barlyq teńgelik depozıtterge ótemaqy júrgiziledi», dedi A.Terentev. Dınara BITIKOVA, «Egemen Qazaqstan».