Ortalyq kommýnıkasııalar qyzmetinde Aralas jekpe-jek kúresi (AJK) Federasııasynyń jetekshileri jáne AJK boıynsha ulttyq qurama komandasynyń músheleriniń qatysýymen aralas jekpe-jek týrnıriniń baspasóz konferensııasy ótti. Qazaq handyǵynyń 550 jyldyǵyna arnalǵan shara aıasynda ótkiziletin aıtýly doda 3 shildede, qala kúni qarsańynda uıymdastyrylmaq. TMD deńgeıindegi AJK-niń kil myqty sportshylaryn jınaıtyn týrnır taqyryby – «Kóshpendiler shaıqasy – 5».
Aralas kúres jekpe-jeginiń quramyna djıý-djıtsý, grek-rım kúresi, erkin kúres, dzıýdo, sambo syndy klassıkalyq kúres túrlerimen qosa, boks, taıboks jáne kıkboksıng syndy eleýli erejesi bar sport túrleri jatady. Tarıhı tamyryn myńjyldyqtardan alatyn osy sporttyń bizdiń elde júıeli damyp jatqanyna biraz boldy. Degenmen, Federasııanyń tabandy eńbeginiń arqasynda 2013 jyly ǵana aralas kúres jekpe-jegi resmı sport túri retinde Qazaqstan Respýblıkasyndaǵy sport túrleriniń memlekettik tizimine endi. AJK boıynsha elimizdiń ulttyq qurama komandasy halyqaralyq deńgeıde moıyndalǵan, álemdik reıtıngte Reseıge ǵana jol beredi. Sport jarysynyń Qazaq handyǵynyń 550 jyldyǵyna qatysy jaıly aıtqan Qazaqstandaǵy AJK Federasııasynyń qurmetti prezıdenti Erlan Qarın: «Aıtýly sharaǵa oraı ótkizilip jatqan mádenı sharalarmen qosa, osy sporttyq jarysty ótkizýdegi basty maqsatymyz – sportshylarymyzdyń eńsesin kóterip, olarǵa qoldaý bildirý. Azııa qurlyǵynda aralas jekpe-jek kúresin uıymdastyrýdan Qazaqstan jetekshi orynda keledi. Osyny paıdalana otyryp, biz 2017 jyly EKSPO-2017 kórmesi aıasynda AJK boıynsha álem chempıonatyn Astanada ótkizetin boldyq, bul biz úshin úlken senim, abyroı», dedi. Al, Qazaqstandaǵy AJK Federasııasynyń prezıdenti Anatolıı Kım aralas jekpe-jek kúresiniń elimizdegi tarıhyna qysqasha toqtalyp, basty tartys Sergeı Harıtonov pen Kennı Garner arasynda ótetinin habarlady. Aıta ketý kerek, bul sportshylardyń kezdesýi match-revansh esebinde bolady. Uıymdastyrýshylardyń aıtýynsha, aldaǵy ýaqytta osy sport túri jaıly promo-rolıkter men fılmder túsirý josparlanýda. AJK boıynsha ulttyq quramanyń bas treneri Baıan Janǵalıev bastaǵan bizdiń shymyr jigitter áýesqoı jáne kásibı týrnırlerde tolaıym tabystarǵa jetip júr. Bas bapkerdiń aıtýynsha, ulttyq qurama aldaǵy ýaqytta Tájikstanda ótetin Azııa chempıonatyna qatysýǵa qyzý daıyndalýda.
Qundyz ERALY. ASTANA.
