Jan jadyratqan jeti saǵattyq júzdesý

Qazirgi Áıteke bı, burynǵy Komsomol aýdanynda jıyrma jyldaı basshylyq qyzmet atqardym. 1992 jyly Prezıdent Aqtóbe oblysyna saparmen kelip, sol kezdegi Komsomol aýdanynda boldy. Sonyń aldynda ǵana meni osy aýdanǵa ákim etip jibergen. Oblys basshylyǵynan «Prezıdent Nursultan Ábishuly Aqtóbege jumys saparymen kelýi múmkin. Sizdiń aýdandy kórsetýdi durys kórip otyrmyz», degen habar tústi. Shynyn aıtaıyn, qatty tolqydym. Qashyq aýdan, aýa raıy da ystyq. Áýeli oılanyp-tolǵanyp, mańyzdy tapsyrmany sanamnan saralap ótkizdim. 20 tamyzda kúni boıy Pre­zıdent saparynan tolyq habardar bolyp otyrdym. Keshke qaraı Prezıdent týraly jazylǵan materıaldardy qaraǵan bolamyn, biraq ol kezde jarytyp eshteńe jazyla qoımaǵan kez. Aqtóbe aýdanynyń kartop ósirýmen shuǵyldanatyn «Qa­zaqstannyń 40 jyldyǵy» keń­sharynda bolǵan kezdesýde je­keshelendirý týraly pikirine eleń ete qalǵanbyz. Sol kúni Prezıdent Hromtaý aýdanynda, Shılisaı óndiristik birlestiginde bolǵanyn teleradıo habarlarynan estidik. 21 tamyzda «Iаroslavskıı» keńshary, № 6 brıgadanyń dala­lyq qosynda saǵat 11-ge taıaý eki tikushaq qonatyny habarlandy. Aınala tolǵan adam. Olardyń arasynda Reseı Federasııasy Orynbor oblysynyń shekaralas aýdandarynan kelgen qonaqtar da bar edi. Bári de Qazaqstan Prezıdentin kórgisi, múmkin bolsa, qolyn alyp amandasqysy, alǵysyn jetkizgisi keledi. Hat­tamalyq tártip boıynsha avto­kólikter tikushaq qonatyn jerden eki-úsh shaqyrym qashyq turaqtaýy kerek. Qarsy alýshylar kólikterin qańtaryp qoıyp, úsh shaqyrymdy elemeı jaıaý keldi. Prezıdent tikushaǵy qondy. Nursultan Nazarbaevpen birge sol kezdegi Premer-Mınıstr Sergeı Tereshenko, onyń birinshi orynbasary Oleg Soskoves, oblys basshylary, basqa da resmı adamdar tústi. Komsomoldyqtar ǵana emes, kórshi Orynbor oblysynan kelgen qonaqtar da asa bir zor yqylaspen, rızashylyq sezimmen qarsy aldy. Halyqtyń óz Prezıdentine degen ynta-yqylasy erekshe ekeni baıqaldy. №6 traktor-egis brıgadasy. Aqshańqan kıiz úıler boı túzegen. Ekeýin japsarlas etip qurdyq ta, úshinshisin sál alshaqtaý bólek ornalastyrdyq. Keńshar dırektory V. Dobrovolskıı men brıgadır A.Getmanchýk te erekshe tolqý ústinde. Meniń kóńil kúıim kútip alǵanǵa deıingiden basqasha, endi ár sátti baqylaýda ustaýym kerektigin, aýdannyń birinshi basshysy retinde barlyq sharýaǵa ­jaýapty ekenimdi sezindim. Sol jy­ly egis erekshe bitik edi. Jaı­qa­lyp turǵan alqapqa bar­­lyǵy da qyzyǵa ári qanaǵat sezimmen qarady. Dala qosyndaǵy tigilgen aǵash úılerde túski tamaq usyndyq. Komıssııa Prezıdentke shaı quıýdy dáriger Dámetken Zeı­­­nol­laqyzyna tapsyrdy. Ol da erek­she abyrjýyn jasyra almaı, tolqýmen júrdi. Taǵy bir aıta ketetin jaıt, Prezıdenttiń qos ba­syndaǵy dıqandar ishetin ydystan sý ishkeni boldy. Bul Memleket basshysy tarapynan kútpegen qadam ári hattama bo­ıynsha olaı jasaýǵa bolmaıdy. Degenmen, Prezıdent halyqtyń yqylasyn kórip, olarǵa iltıpat kórsetti. Prezıdent egistikti aralaǵan kezde astyq shyǵymyna, kútimine rıza boldy. Nursultan Nazarbaev jáne joǵary mártebeli basshylar Komsomol aýdanynyń ortalyǵyna bet aldy. Joldyń eki jaǵyna jiti kóz salyp qoıady. О́te ańǵarympaz, tez oılap, jyldam túıin jasaıdy eken. El tilegi egis ústinde ekenin baıqap kele jatqan Nuraǵań «myna alqaptar bıyl óte jaqsy astyq beredi» dep kóńildene tústi. Aýdan ortalyǵyna kele jat­qanda jaǵalaı kútip turǵan adamdardy kórip, olarǵa kúlimdeı, qol bulǵady. Aýdan halqy alańǵa túgel jınaldy desem bolady. Qıyndyq týǵyzǵany da sol. Ár adam Tuńǵysh Prezıdentin kórgisi, jaqyn barǵysy, qolyn ustap amandasqysy keledi. Buǵan álemdik tájirıbe boıynsha da ruqsat etilmeıdi. Qalyń halyqty qatar ornalastyryp, olarmen sóılesip, kishini de, úlkendi de renjitpeı kóńilin tapqan aýdan azamattary – sol kezdegi aýdandyq sottyń tóraǵasy Iskendir Muratqanov pen aýdandyq mılısııa bóliminiń bastyǵy Ǵalym Dáýletalın biliktilik kórsetti. Aýdan ortalyǵynyń bas ala­ńy. Keńester úıi men Mádenıet úıiniń ortasy. Prezıdent izet bildire amandasyp, halyqqa bet aldy. Aman-saýlyq surasqan soń jınalǵandarǵa kezek berdi. Sol jyldarǵy halyqtyń jaǵdaıyn búgingi kúnmen salystyrýǵa múlde bolmaıdy. Eldiń áleýmettik-turmystyq jaǵdaıy tym kúrdeli bolatyn. Soǵan qaramaı, halqy eshqandaı artyq áńgime aıtqan joq. Qaıta Prezıdentke sara saıasaty úshin alǵys sezimderin bildirip jatty. Al aýdan halqy atynan Prezıdentke alǵashqy sapary bolǵandyqtan, arǵymaq at mingizilip, shapan jabyldy. Halyqtyń kóterińki kóńil kúıi, ózine degen yqylasymen qa­nattanǵan Prezıdent qoshtasýǵa emeýrin bildirgende, shaıdaı ashyq aspannan kútpegen jerden jańbyr quıdy. «Nur, nur jaýdy, elimiz nurly bolady, Nursultan Ábishulynyń joly bolady», dep shýlasty jurtshylyq. Muny men de jaqsy yrymǵa joryp, kóńil kúıiniń erekshe ekenin sezip, yrym jasaǵym keletinin Prezıdentke tikeleı jetkizdim. – Nursultan Ábishuly, ǵafý etińiz, aýdan halqy Sizge sát sapar tileıdi, osy toptyń arasynda meniń kishkentaı ulym Aqylbek kesheden beri Sizdi kóremin dep júgirip júr. Sol balany shaqyrýǵa, Sizdi jaqyn kórýine ruqsat etesiz be? – dep suradym. Prezıdent «Qane», – dep kelisti. Júgirip kelgen Aqyl­bekke aq batasyn berip, kekilinen sıpady. Nur ústine nur degen osy shyǵar dep shattana tús­tik. Besin mezgilinde Prezıdent jáne onyń qasyndaǵylar ush­yp ketti. Prezıdenttiń aýdan ­ahýa­lymen tanysqan, adamdarmen pikir­lesken jeti saǵatqa jýyq júzdesýin qazir de qanaǵat sezimmen eske alamyn. ...Arada jıyrma eki jyl ótkende, ústimizdegi jyldyń 23 maýsymynda Elbasynyń Aqtóbege kelý saparynda men taǵy da oǵan aq tilegimdi aıtý múmkindigine ıe boldym. Sol kezde Tuńǵysh Prezıdent Nursultan Nazarbaevtyń Aqtóbege alǵashqy sapary oıǵa oralyp edi. Esimhan ESENBAEV, «Ǵasyr Nury» qaıyrymdylyq qorynyń dırektory. Aqtóbe oblysy. Sýret sol kezdegi QazTAG-tiń fototilshisi Murat MÁMBETOVTIŃ arhıvinen alyndy.