Otty jyldarǵa oralsaq...

Shalǵaıdaǵy Qaztalov aýdany jurt­shylyǵy Jeńistiń 70 jyldyǵyn laıyqty qarsy alýǵa erte bastan qam jasady. О́ńirde bul baǵyttaǵy arnaıy  uıymdastyrý komıssııasy ótken jyly qurylǵan. Qaztalov aýdany ákiminiń orynbasary Záılim Májıtova gazet tilshisine osynaý qasterli merekeni qarsylaı otyryp, sonymen bir mezgilde jas urpaqtyń boıynda otanshyldyq sezimdi damytý men patrıottyq tárbıe baǵytyndaǵy san alýan is-sharalar qatar atqarylyp kele jatqanyn aıtyp berdi. Osy arada atap óterlik másele KSRO aýmaǵynda 4 jyldan astam ýaqytqa sozylǵan soǵys kezinde qazaq jerinde áskerı is-qımylar men shaıqastar ótpegenimen, elimizdiń batys óńirindegi Bókeı Orda, Jánibek aýdandary Stalıngrad maıdanynyń shebine kirdi. Osy qatarǵa Jánibekpen kórshiles qonystanǵan Qaztalov aýdanyn da qosýǵa bolady. Stalıngrad – qazaq dalasynyń atalǵan óńirlerine óte jaqyn turdy. Mysaly, Jánibekten Volgograd qalasyna avtokólikpen barýǵa úsh-tórt saǵat qana ýaqyt ketedi eken. Joǵaryda aıtylǵandaı Stalıngrad Qazaq­stanǵa eń jaqyn ornalasqan maıdan bolǵandyqtan, bul shaıqasqa qazaq­stan­dyqtardyń qatysý úlesi de basqa maıdandarmen salystyra qaraǵanda kóbirek bolǵanyna kóz jetkizý qıyn emes. Qaztalov aýdanynda Jeńis merekesi qarsańynda júrgizilip jatqan tárbıe jáne patrıottyq jumystarynyń bir tarmaǵy dál osy tustan tamyr tartady. Stalıngrad maıdanyna qarasty dańqty №62 armııanyń quramynda tórt myńǵa jýyq qazaq bolǵan eken. Stalıngrad túbindegi urystar kezinde 112 adamǵa Keńes Odaǵynyń Batyry ataǵy berilse, onyń tórteýi qazaqstandyq ekenin de bile júrgenniń artyqshylyǵy joq. Olar – ushqysh  N.Ábdirov, polk komandıri T.Pozolotın, vzvod komandıri G.Ramaev jáne mınometshi T.Sypataev. Buǵan qosarymyz Stalıngrad shaıqasyna qatysyp kóz jumǵandar Jeńistiń bolatynyna kámil sengenin olardyń Mamaı qorǵany qabyrǵasyna jazyp ketken sózderinen baıqaýǵa bolady. Olar qatelesken joq edi. О́ıtkeni, Stalıngrad shaıqasy Uly Otan soǵysynyń barysyna kúrt betburys ákelip, eń alǵash ret Jeńiske degen senimdi jaqyndata túskeni tarıhtan belgili. Stalıngrad shaıqasy kezinde qazaqtar erliktiń tamasha úlgilerin kórsetken. Olardyń júrekjutqandyǵy men batyldyǵyna, jaýmen arystansha arpalysqan shalt is-qımyldaryna stalıngradtyqtar da dán rıza bolǵan eken. Stalıngrad-Volgograd qalasynyń bir kóshesine qazaq ataýynyń berilýi olardyń bizdiń ata-aǵalarymyzǵa degen súıispenshiligi men rızashylyǵynyń bir kórinisi. – Taıaýda Qaztalov jáne Jánibek aýdandarynyń ókilderi qaharman qala Volgogradqa baryp qaıtty. Muny alǵashqy izashar dep baǵalaǵan oryndy. О́ıtkeni, basty sapar aldymyzdaǵy sáýir aıyna josparlanǵan. Bul úlken delegasııanyń negizgi quramyn Stalıngrad shaıqasyna atalǵan aýdandardan qatysqan maıdangerlerdiń keıingi urpaqtary quraıdy. Osy arqyly keshegi surapyl soǵysta sheıit ketken bozdaqtar men aǵa urpaqty rýhyna taǵzym etkendi oılastyryp otyrmyz, – deıdi Qaztalov aýdany ákiminiń orynbasary Záılim Májıtova. Jýyrda oblys ortalyǵynda «Qaztalov otty jyldarda» atty derekti beınetúsirilimniń tusaýkeser rásimi ótkizildi. Onyń sońy «Erlik jyry – eldiktiń eskertkishi» atty taqyryptyq konsertke ulasty. Bul shalǵaıdaǵy Qaztalov aýdanynda bıylǵy jyldyń basynda bastalǵan «Uly erlikke – máńgilik taǵzym» atty mekeme-kásiporyn ujymdary qoıǵan festıvaldyń qorytyndysyndaı áser qaldyrdy. Túıip aıtqanda, biz Jeńistiń 70 jyldyǵyn atap ótýdi mazmundy da maǵynaly, tálimdi de tárbıeli ister arnasyna baǵyttaı bilgen Qaztalov aýdany ákimdigi men jurtshylyǵynyń tastúıin ázirlikterin oqyrmandar nazaryna usynǵandy jón kórdik. Temir QUSAIYN, «Egemen Qazaqstan». Batys Qazaqstan oblysy, Qaztalov aýdany. Sýrette: Jeńis merekesine ázirlik sáti­nen kórinis.