Saılaýdyń ádil ótýine atsalyspaq

Keshe M.H.Dýlatı atyndaǵy Taraz memlekettik ýnıversıtetinde prezıdenttik saılaýdy baıqaý jónindegi respýblıkalyq qoǵamdyq komıssııanyń Jambyl oblysyndaǵy fılıaly brıfıng ótkizdi.  Bul uıymnyń baıqaýshylary saılaýǵa qatysýshy árbir kandıdattyń barlyǵyna birdeı jaǵdaı jasalýyn qadaǵalaıdy jáne qandaı da bolmasyn quqyq buzýshylyqtyń oryn alýyna jol bermeıdi. Iаǵnı, komıssııa músheleri saılaýdyń ádil de shynaıy ótýine atsalyspaq. Atap aıtqanda, prezıdenttikke kandıdattardyń saılaýaldy sharalarynyń zańdylyǵyn, BAQ arqyly nasıhattaýdaǵy tepe-teńdikti qadaǵalamaq. Jalpy oblys kóleminde 461 baıqaýshy jumys jasaıtyn bolady. Ol úshin aldymen baıqaýshylar úshin semınar-trenıngter ótkiziledi. «Baıqaýshylar saılaý kúni saılaý ýchaskelerinde qoǵamdyq uıymnyń atynan qatysady. Olarǵa qoıylatyn basty talaptardyń biri – «Saılaý týraly» Zańdy jaqsy bilý. Sonymen qatar, baıqaýshylar úshin ádistemelik quraldar, jadnama men hattama úlgisimen baıqaýshy bloknoty daıyndaldy. Fılıal ofısi jumysy úzdiksiz júrgiziledi, al dem­alys kúnderi arnaıy kezekshilik uıymdastyrylǵan», deıdi bul jóninde Prezıdenttik saılaýdy baıqaý jónindegi Respýblıkalyq qoǵamdyq komıssııanyń Jambyl oblysy boıynsha fılıalynyń tóraıymy Parıda Mamedova. Qoǵamdyq komıssııa barlyq qoǵamdyq uıymdarmen jáne azamattarmen áriptestik qatynas ornatyp, jalpy saılaýdyń ádil jáne halyqaralyq standarttarǵa saı ótkizilýin qadaǵalaıtyny jaıly aqparattandyryp otyrady. Saılaý aıaqtalǵan soń óz jumysynyń nátıjesin jarııa­laıdy. Oralhan DÁÝIT, «Egemen Qazaqstan». Jambyl oblysy.