Baıqaýshylardy akkredıtteý jalǵasýda

Saılaý dodasy qyzǵan saıyn onyń barysyn baıqaýǵa degen qyzyǵýshylyq ta artyp keledi. Osy máselege oraı keshe Ortalyq saılaý komıssııasy «2015 jylǵy 26 sáýirge taǵaıyndalǵan Qazaqstan Respýblıkasy Prezıdentiniń kezekten tys saılaýyna shet memleketter men halyqaralyq uıymnyń baıqaýshylaryn akkredıtteý týraly» arnaıy qaýly qabyldady. Ortsaılaýkom qabyldaǵan qu­jatqa sáıkes elimiz syrtqy saıasat vedomstvosynyń usynýymen úsh halyqaralyq uıym men toǵyz memleketten 101 baıqaýshyny akkredıtasııa­dan ótkizgeni belgili boldy. Bul rette sol tirkeýden ótkenderdiń 74-i TMD Baıqaýshylar mıssııasynan kelipti. Shanhaı yntymaqtastyq uıymynan baıqaýshylyq mıssııany atqarýǵa 1 adam tirkelse, Túrkitildes memleketter yntymaqtastyǵy keńesinen 7 baıqaýshy kelgeni málim bolyp otyr. Budan basqa, baıqaýshylardyń tórteýi Amerıka Qurama Shtattarynan, al úsheýden – Ispanııa Koroldigi men Mol­dova Respýblıkasynan jetken. Sondaı-aq, ekeýden – Malaızııadan, Pol­sha Respýblıkasy men Italııa Respýblıkasynan kelipti. Al Ulybrıtanııa men Soltústik Irlandııa Birikken Koroldiginen, Fransııa men Belgııa Koroldiginen bir-bir baıqaýshy akkredıttelipti. Ortalyq saılaý komıssııasynyń múshesi Marat Sársembaevtyń málimetine qaraǵanda, jalpy baıqaýshylar sany 435 adamdy qurap otyr. Sonyń ishinde EQYU Saılaýdy baıqaý jónindegi mıssııasynan 43 adam 25 memleketten kelipti. TMD Baıqaýshylar mıssııasynan 223 adam jeti memleketten kelip, akkredıtasııadan ótken. Bul jerde Shanhaı yntymaqtastyq uıymy baıqaýshylar mıssııasynan 4 memlekettiń arnaıy ókilderi baıqaýshy retinde jiberilgeni belgili boldy. Halyqaralyq uıymdardyń úsh mıssııasynan (EQYU/DIAQB jáne TMD) 7 adamnyń tirkelgeni, shet memleketterden 27 baıqaýshy mıssııasyna kiriskeni de alǵa tartyldy. Sonymen, bir halyqaralyq uıym (Túrkitildes memleketter yntymaqtastyǵy keńesi) men shet memleketterdi qosa alǵanda, 337 baıqaýshy akkredıttelgen. Sondaı-aq, Qazaqstan Respýblıkasy Syrtqy ister mınıstrligi 19 memleketten buqaralyq aqparat quraldarynyń 98 ókilin akkredıttegeni belgili boldy. Akkredıtasııalyq kezeńnen ótken sheteldik baıqaýshylardyń jalpy sany 435 eken.  Ortalyq saılaý komıssııasynyń múshesi buqaralyq aqparat quraldarynyń ókilderi tarapynan qoıylǵan saýaldarǵa da jaýap berdi. M.Sársembaev árbir sheteldik baıqaýshy Qazaqstan zańnamasy ere­jeleri boıynsha jumys isteýi tıis. О́ıt­keni, elimiz aýmaǵynda óz zańymyz jú­redi. Biraq keıbir baıqaýshylar EQYU nemese TMD Baıqaýshylar mıssııa­synan bolǵandyqtan, ózderiniń kodeks normalary boıynsha da jumys isteıdi. Qazaqstan Respýblıkasynyń saılaý týraly zańnamasynyń normalary, erejeler men mindettemeler jáne quqyqtary halyqaralyq uıymdardyń kodeksine sáıkes keledi. «Sondyqtan eshqandaı qaıshylyq joq. Olar Qazaqstannyń zań erejelerin oryndaımyz dese de, halyqaralyq kodekster normalaryn oryndaımyz dese de bir-birine saı bolyp tabylady. Burynǵy saılaý naýqanynda eshqandaı zań buzýshylyqtar oryn alǵan joq jáne de aldaǵy saılaýda da solaı bolaryna senim mol», dedi Marat Aldońǵaruly. Asqar TURAPBAIULY, «Egemen Qazaqstan».