Aqtóbede ózge ulttyń jastary memlekettik tilde sheberlik synasty

AQTО́BE. 19 qazan. Aqtóbede Qazaqstan halqy assambleıasynyń 20 jyldyǵy aıasynda til merekesine oraı Abaı Qunanbaevtyń 170 jyldyǵyna arnalǵan etnomádenı birlestikterdiń jastary arasynda «Tilim meniń – baılyǵym» atty baıqaý ótkizildi. Bul týraly egemen.kz tilshisi habarlady. Oblystyq mádenıet, muraǵattar jáne qujattama basqarmasy men Dostyq úıi birlesip uıymdastyrǵan bul baıqaýǵa 15-20 jas aralaǵyndaǵy qazaq mektebinde oqymaıtyn ózge ulttardyń segiz úmitkeri qatysty. Baıqaý shymyldyǵyn Tahaýı Ahtanov atyndaǵy oblystyq drama teatrynyń ártisi Áset Orazalın Abaıdyń monologyn oqýmen ashty. Sodan keıin baıqaýǵa qatysýshylar «Sálemdesý paryzyń» atty kezeńde ózin memlekettik tilde tanystyrsa, «Uly Abaı shyǵarmashylyǵy» bóliminde Abaıdyń qara sózin nemese bir óleńin jatqa oqydy. Al «Abaı joly» kezińinde romannan úzindi keltirdi. Sondaı-aq, «Abaı – halyqtyń uly perzenti» degen taqyrypta ózi jazyp alyp kelgen shyǵarmany usyndy. Tórt kezeńde ózgelerden ozyq óner kórsetken tatar etnomádenı birlestiginiń ókili Rozalııa Ishakova bas júldeni jeńip alsa, birinshi oryndy ázerbaıjan etnomádenı birlestiginiń namysyn qorǵaǵan Gýllara Abılova ıelendi. Ekinshi oryn bashqurt etnomádenı birlestiginen kelgen Rýfına Iаrlykapovaǵa buıyrsa, bolgar qyzy Lılııa Marınova úshinshi orynnan kórindi. Jeńimpazdar men júldegerlerge alǵys hat pen baǵaly syılyqtar tapsyryldy. Baıqaýǵa qatysýshylardyń qaı-qaıysysy da qur qol qaıtqan joq, túrli marapattarǵa ıe boldy. Shara sońy ádemi án men kúmbirlegen kúıge ulasty. Satybaldy Sáýirbaı. Derek, sýret: egemen.kz.