Aqtóbelik balýan – álem chempıony

Jaqynda Ońtústik Koreıanyń Men­gýn qalasynda ótken VI álemdik áskerı oıyndardyń grek-rım kúresinen sport sheberi Meırambek Aınaǵulov jeńimpaz atanyp, oljaly oraldy. Tórt jylda bir ret ótkiziletin bedeldi jarysqa bıyl 117 elden 7 myńnyń ústinde sportshylar qatysypty. Qorǵanys mınıstrliginiń armııashylardyń ortalyq sport klý­bynyń qyzmetshisi Meırambek Aınaǵulov barlyq beldesýlerin 10:0 esebimen utyp, qarsylastaryn taza jeńgen. Aqtóbelik balýan aldymen jastar arasynda álem chempıony ázerbaıjan K.Mammodovtyń jaýyrynyn jer ıisketse, odan keıin 23 jasqa deıingiler arasyndaǵy Eýropa chempıonatynyń qola júldegeri túrik Kırazadan, Azııa chempıony, kilem ıe­si koreı balýany Choı Innen basym túsken. Al aqtyq básekede Afrıka oıyndarynyń, Afrıka qurlyǵynyń chempıony egıpettik H.Mahmýdti taza jeńdi. Ol – otandyq grek-rım kúresi mektebiniń tarıhynda mundaı jeńiske jetken tuńǵysh sportshy. Osylaısha jas balýan halyqaralyq dárejedegi sport sheberi normatıvin oryndady. Meırambektiń jeke jattyqtyrýshylary Rahymjan Baqytjanov pen Qaıyrjan Bekenbaevtyń bul joly da úkili úmitteri aqtaldy. – Bul meniń ǵana emes, jattyq­ty­rýshylarymnyń, meni qoldaǵan oblystyq dene shynyqtyrý jáne sport basqarmasynyń, grek-rım kú­­resi fe­derasııasynyń, «Aq­pan» kom­panııasynyń, barsha jankúıerlerimniń jeńisi, – deıdi Meırambek Aınaǵulov. Ol Shalqar qalasynda týyp, ósip, osyndaǵy V.Sehanovıch atyndaǵy №1 BJSM-da boz kilemniń dámin tatyp, jattyǵýyn bastaǵan. Jas balýan kadetter arasynda 2011 jyly álem chempıony atandy. 2013 jyly eresekter arasyndaǵy Qazaqstan Kýbogynyń ıegeri, ótken jyly eresekter arasynda Qazaqstan chempıony, sondaı-aq eresekter arasynda Qazaqstannyń IV jazǵy spartakıadasynyń jeńimpazy bolǵan nebári 21 jastaǵy Meırambek Aınaǵulovtyń sporttaǵy alar asýy alda, bolashaǵy budan da úmitti. Satybaldy SÁÝIRBAI, «Egemen Qazaqstan». Aqtóbe oblysy.