Erekshe kórme

Ulttyq mýzeıde Ulybrıtanııadan kelgen erekshe shaı kórmesi ótti. Shara Astana kúnine jáne Ulttyq mýzeıdiń 1 jyldyǵyna oraı uıymdastyryldy. Onda «Chitra by Newby» halyqaralyq biregeı shaı kolleksııasy tanystyryldy.  Qazaqstan – «Chitra by Newby kolleksııasynan» halyq­aralyq kórmesi ótkizilgen alǵashqy el. Kórmeni Qazaqstan Res­pýblıkasynyń Mádenıet jáne sport mınıstrligi, Brıtanııalyq kommersııalyq emes N.Sethia Foundation qaıyrymdylyq qory jáne Qazaqstan Respýblıkasynyń Ulttyq mýzeıi uıymdastyrdy. Sondaı-aq, kórmeni uıymdastyrýǵa Qazaqstan Respýblıkasynyń Ulttyq banki qoldaý bildirgen, al kolleksııany resmı tasymaldaýshy – «Eır Astana» AQ. «Búgingi kúndi tarıhı kún dep aıtýǵa bolady. Dál osy kórmeni Elbasymyzdyń ózi tamashalap, úlken baǵasyn berip ketti. Shaı mádenıeti qazaq halqyna eshqashan bóten bolǵan emes. Biz basqa halyqtardan kem shaı ishpeımiz. Al shaıdyń tarıhyna qatysty tyń  derekterdi bilý úshin biz osyndaı kórmelermen tanysýymyz kerek. Osynda turǵan árbir shaı jabdyǵynyń óziniń tereń tarıhy bar. Bul jerden osydan jeti-segiz ǵasyr buryn jasalǵan buıymdardy kórýge bolady. Olardyń barlyǵy bizdiń rýhanı dúnıemizdi baıytady.Men osy kórmeni uıymdastyryp, álemniń jaýharlarynyń bizdiń aldymyzǵa kelýine uıytqy bolǵan Ulttyq bank tóraǵasy Qaırat Kelimbetovke, Nırmal Sethııa myrzaǵa erekshe alǵys aıtqym keledi», – dedi kórmeniń ashylýynda sóılegen sózinde Ulttyq mýzeı dırektory Darhan Myńbaı. «Chitra by Newby kolleksııasynan» kórmesi Astana turǵyndary men qonaqtaryn erekshe qundy jádigerlermen tanystyryp, shaı ishý mádenıetinde qalyptasqan dástúrler týraly jáne osynaý kóne sýsynnyń tarıhynan habardar etti. «Chitra by Newby kolleksııa­syn» jınaqtaýshy – N.Sethia Groupof Companies jáne «N.Sethia Foundation» qaıyrymdylyq qorynyń tóraǵasy Nırmal Kýmar Sethııa. Londonda ornalasqan «Chitra by Newby kolleksııasy» – bul shaı tarıhymen baılanysty jalǵyz jeke antıkvarıattar toptamasy. Kolleksııa quramynda Eýropa, Azııa jáne Amerıkada jasalǵan qoldanbaly óner týyndylarynyń 1500-den astam sırek jáne ǵajap úlgileri bar. Kolleksııa myń jyldyq ýaqyt aralyǵyn qamtıdy: Sýn dınastııasy (H-HIII ǵ.ǵ.) kezindegi pıalalar men sasýmalyq keremet farfor sháınekterden bastap Vıktorıandyq dáýirdegi saltanatty shaı ydystary men HHI ǵasyrda jasalǵan sándi aksessýarlarǵa deıin – Qytaıdyń Mın dáýirine jatatyn kókala farfordan jasalǵan, kúmispen bezendirilgen «kraak» stılindegi sháınek, ashyq teńiz tolqyny tústes nefrıtten jasalǵan, aıdahar beınelengen kese, Qytaıdyń Kansı dáýirine jatatyn altynmen bezendirilgen farfor sháınek, borokko stılinde Nıderlandta jasalǵan sháınek (1700), altynmen bezendirilgen, gelıotroptan jasalǵan sháınek, altyn jalatylǵan kúmis sháınek pen shaı tabaq, Brıtanııa jáne taǵy basqalar bar. Dınara BITIKOVA, «Egemen Qazaqstan». Sýretti túsirgen Erlan OMAROV.