Ataqty mametmatık Djon Nesh kólik apatynan qaıtys boldy

ALMATY. 25 mamyr. Amerıkalyq matematık, ekonomıka salasy boıynsha Nobel syılyǵyn alǵan Djon Nesh Nıý-Djersı shtatynda kólik apatynan qaza tapty. 86 jastaǵy ǵalymnyń janynda qatar otyrǵan áıeli – 82 jastaǵy Alısııa Nesh te kóz jumdy. Bul týraly RBK habarlady. Jergilikti basylymdardyń málimetine qaraǵanda, erli-zaıyptylar taksıdiń salonynda qaýipsizdik beldigin taqpaǵan eken. Taksı júrgizýshi aýyr soqqydan aman qalyp, aýrýhanaǵa tústi. Esimi Dúnıejúzine tanymal ǵalymnyń shynaıy ómiri «Sana oıyndary» atty Gollıvýd fılmine ózek bolǵanyn kórermender jaqsy biledi. Ǵalymnyń beınesin amerıkalyq kınojuldyz Rassel Kroý somdaǵan. Kartına 4 ret «Oskar» syılyǵyn ıelendi. Ǵalymnyń kólik apatyna ushyraýyna baılanysty Rassel Kroý Tvıtterde olar týraly: «Aqyly úılesken, júregi bir, bastary túısiken tamasha otbasy edi» dep jazdy. Nesh 1994 jyly ekonomıka salasyndaǵy «Kooperatıvti emes oıyndardyń teorııasyndaǵy tepe-teńdikti túbegeıli saraptaý» taqyryby úshin Nobel syılyǵynyń laýreaty atandy. Keıin belgili bolǵanyndaı, bul oıyn teorııasynyń negizin Nesh 21 jasynda, 1949 jyly jazǵan eken. Nesh aýyr syrqat ekenine qaramastan matematıkadan esh ýaqytta qol úzgen emes. Álemdik ǵylym keńistiginde «Neshtiń tepe-teńdigi» degen ataýly uǵym bar. Djon Nesh 2012 jyly Qazaqstanǵa kelip, Astana forýmyna sarapshy retinde qatysqan. Talǵat Súıinbaı. Derek, sýret: RBK.