Meniń ornymda ózgeler de osylaı ister edi

– deıdi «Erligi úshin» nomınasııasynyń ıegeri,  búgingi kúnniń bala batyry Nıkıta TIýKIN Qazan aıynyń basynda As­tanada «Máńgilik El – bolashaǵy birtutas el» taqyrybynda respýblıkalyq patrıottar forýmy ótkizildi. Osy sheńberde «Jyl patrıoty» baıqaýynyń qorytyndysy shyǵarylyp, munda jeńimpazdar jeti atalym boıynsha marapattaldy. Solardyń ishinde Zelenov aýdanyndaǵy Dostyq aýylynyń turǵyny, 8-synyp oqýshysy Nıkıta Tıýkın «Erligi úshin» atalymyna ıe boldy. Oǵan bul marapat ne úshin berildi? Biz tómende onyń jaı-japsary men mán-jaıyn aıtqandy jón kórdik. «...Dostyq mektebiniń jetin­shi synyp oqýshysy sýǵa batyp bara jatqan eki qyzdy qut­qaryp qalypty» degen aqparat áleýmettik jelilerdi sharlap ketken kezde biz de búginginiń batyry – Nıkıtany kezdestirýge asyqtyq. Biraq, eresek adamnyń ózi oılanyp qalar sátte qaımyqpastan sýǵa sekirip, talyqsyp jatqan jandy qutqaryp alǵan balanyń erligi jurtshylyq pen jergilikti bılik ókilderiniń nazarynan tys qalǵan joq. Shaqyrdy, quttyqtap qoldaý bildirdi, marapattap, kópke úlgi etti. Bala batyrymyzdyń sál saıabyrsyp, óz-ózine kelgen sátin kúttik. Sonymen qalaı boldy ózi?! 24 mamyr – jurttyń bári erteń bolatyn sońǵy qońyraý saltanatyna daıyndalyp jatqan shaq. Dúkenge barmaq bolǵan dosyna qannen-qapersiz ilese shyqqan Nıkıta jol-jónekeı synyptasy Darıa men bir synyp tómen oqıtyn Mılanany kezdestiredi. О́zenge shomylýǵa bara jatqandaryn bil­gen Nıkıta esh oılanbastan qyzdarǵa ilesip kete bardy. – Ol sátte meniń sýǵa shomylý oıymda bolǵan joq, tipti. Qyz­darǵa ilesip júre berippin, dosym bolsa dúkennen keregin alyp jónine ketti, – degen Nıkıta sol sátte qyzdarǵa ilesýge qandaı da bir tylsymnyń áseri bolǵanyn sezgendeı. – Sýǵa birinshi tústim, sal­qyn­daý eken. Bir túrli kóńi­lim qobaljyp qyzdarǵa alań­daýmen boldym. О́zenniń bel ortasyna deıin júzdim, qyz­dar da qaptaldasa jetti. Shar­shaǵandaryn baıqamadym. Keri qaıtqanymda qyzdar alys­tap qala berdi. Oıymda eshteńe joq men bir mezette Mılananyń álsi­rep, sharasyzdanǵanyn sezdim. «Qutqarý kerek» degen oımen janyna tezdetip baryp, jaǵaǵa súıreı jóneldim. Áreń dep shy­ǵara bergenim sol Darıaǵa kózim túsip ketti. Bir ret qolyn sermep, yshqyndy da sýǵa batyp ketti. Kómekke shaqyratyn da jýyq mańda eshkim joq, qaıta sýǵa sekirdim. Súńgip, tereńdesem sýyq sý deneni qaryp barady, Darıa joq. Entigip sý betine shyq­tym, biraq qorqynysh joq. Dos­tarmen keıde osylaı bir­deńe izdep, ýádelesip oınaıtyn­byz. Qaıta súńgidim. Negizi ózim kishkentaıymnan sý astynda kó­zimdi ashyp súńgımin. Shomylyp júrgen kóp adam bolmasa, sý móldirep turady. Shapshańdap súńgip, ońdy-soldy sharlap edim, Darıanyń aıaǵy sezildi. Jarmasa ketip, joǵary kóterildim. Aýyr­lap ketken, qımylsyz. Jaǵaǵa alyp shyqqan kezde teledıdar­dan kórgen sýdan qutqarý erejesi esime tústi de shalqasynan jat­qyzyp keýde tusynan qatty so­ǵyp, qos qoldap janshı berdim. Kenet loqsyp jutqan sýdy qusyp, tynystaı bastady. Aıaq-qoly qurysyp qalǵan sııaqty boldy. Sodan kómekke adamdar keldi, qyzdardy ata-analary alyp ketti, – degen Nıkıta ajaldan adam qutqaryp, batyrlyq áreket etkenin balanyń oıyny sııaqty kóredi eken. Táptishtep suramasań, artyq sózge sarań bala uıalyp, kózin taıdyra bere­di. «Sabaǵyń qalaı?» – dedik áńgimeniń aýanyn sál ózgertip. «Normalno» – dep jymıdy, ákesine urlana qarap. – Nıkıta júzýdi ózi úırenip aldy jáne ózi aıtqandaı kish­ken­taıynan kózin ashyp súńgıdi. Erke ósti, azdap qıqarlyǵy da joq emes. Olaı bolmasa, erlikke barmas edi ǵoı, – dedi ákesi Rınat ulyna súısine qarap. – Qaı salany tańdasa da ózi biledi, sporttan da qara jaıaý emes, tehnıkaǵa qatty qyzyǵady. Jýyrda osy áreketin baǵalaǵan almatylyq kásipker jigit 200 myń teńge aqsha joldady. Onysyna rahmet, árıne, balamnyń armandap júrgen motosıklin alyp berdik. Anasy ekeýmiz «Oral nany» naýbaıhanasynda jumys­tamyz. Nıkıta kóbine úıde ózi qalady. Balanyń dosqa qamqor, batyl da sezimtal bolyp ósýine ustazdarynyń sińirgen eńbegi zor dep oılaımyn. Mektepte psıhologııalyq baǵyttaǵy «Otba­sylyq tárbıe» kabıneti jumys jasaıdy. Anasy qoly qalt etkende sol jerde ul bala tárbıesine qatysty keńes alyp, balanyń úıden tys ýaqyttaǵy tártibin talqylap otyrady. Mektep pen tyǵyz baılanysý arqyly biz Nıkıtanyń boıyndaǵy biraz qıqarlyǵyn rettep kelemiz. Endi, mine, maqtanyshymyzǵa aınalyp, el súısingen erlikke bardy. Balamdy osyndaı erlikke, adamgershilikke baýlyǵan ustaz­daryna alǵysym sheksiz, – degen ákesi balasynyń boıynan erekshe qabilet baıqaıtynyn jasyrmady. – Muny men erekshe erlik pen is-áreket dep oılamaımyn. Meniń ornymda bolsa ózin respýblıkanyń patrıoty dep sanaıtyn árbir dos-qurbymyz dál osylaı jasaıtynyna kúmánim joq. Meniń qazirgi alǵa qoıǵan maqsatym – mektepti oıdaǵydaı aıaqtap, sodan keıin ózim alǵa qoıǵan maqsatqa qol jetkizý. Meni tótenshe jaǵdaılar qyzmeti, adamdardy oqys oqıǵalardan qutqarý áreketi erekshe qyzyqtyrady. Erjetkennen keıin osy baǵytta arnaıy mamandyq alyp, ortaq Otanymyz – Qazaqstannyń bir qajetine jaraǵym keledi. Men «Erligi úshin» nomınasııasyn qazaq qyrany, ǵaryshker-ushqysh Aıdyn Aıymbetovtiń qolynan alǵanymdy maqtanysh tutamyn. Men de bolashaqta Aıdyn aǵama uqsap, boı túzemek oıym bar, – dedi bizdiń keıipkerimiz. Biz bala batyrǵa «til-kózden aman bolǵaısyń» degen tilegimizdi ishteı aıtyp qala berdik. Nurjan DÚZBATYROV, jýrnalıst, Temir QUSAIYN, «Egemen Qazaqstan». Batys Qazaqstan oblysy, Zelenov aýdany, Dostyq aýyly. Sýrette: «Erligi úshin» nomınasııasyn ıelengen baqytty sát.