Saýsaq birikpeı ıne ilikpeıdi

Qazaqta «Kóppen kór­gen uly toı» degen ǵıb­rat­ty sóz bar. Qa­zir jurt­tyń áńgimesine baqsań, ekiniń biri daǵdarys jaıly aıtady. Qorqyp sóıleıdi, qorqytyp sóıleıdi. Hal­qymyz jamanshylyq shaqyryp sóılegenderdi unatpaı, «aıtqan jerden aýlaq» deıdi. Daǵdarys búkil álemdi sharpyp tur. Eshkimge de ońaı tıip jatqan joq. Qur baıbalam salǵansha eńbektený kerek. Daǵdarysty qarsy tursań ǵana eńseresiń. Elbasy osylaı bolaryn aldyn ala aıtty. Jón-jobasyn túsindirdi. Arnaıy baǵdarlamalar qabyldap, Úkimetke tıisinshe tapsyrmalar berdi. Áleýmettik jaǵynan az qorǵalǵan qaýymǵa úlken jeńildikter qarastyrylýda. Densaýlyq saqtaý men bilim berý salasy qyzmetkerlerine 28-29 paıyz mólsherinde eńbekaqysy kóteriledi degeni júregimizdi jylytty. «Eńbek ete alatyndarǵa mem­lekettik qoldaý tek olardyń qaıta oqýǵa nemese eńbekpen qamtý baǵdarlamalaryna qatysýlary negizinde usynylatyn bolýy tıis. Úkimetke áleýmettik kómektiń mundaı túrlerin 2017 jyldan bastap engizýdi tapsyramyn. Áleýmettik saıasattaǵy memlekettiń basymdyǵy adam kapıtalyn damytýǵa keń aýqymdy ınvestısııalar bolýy tıis. Biz buǵan deıin qabyldanǵan baǵ­darlamalarǵa sáıkes, bi­lim berý jáne den­saý­lyq saqtaý salala­ryn jań­ǵyrtýdy jalǵas­tyr­ýymyz kerek. Men 2017 jyldan bastap jańa joba – «Barsha úshin tegin kásiptik-tehnıkalyq bilim» baǵdarlamasy bastalatynyn jarııalaımyn. Úkimetke ony jasaýǵa kirisýdi tapsyramyn», dedi Memleket basshysy. Bizde mektep bitirgennen keıin oqýǵa túse almaı, ata-anasynyń moınynda otyrǵan jas­tar kóp. Jumysqa shyǵaıyn dese mamandyǵy joq. Jumys bolmaǵan soń buıyǵylanady, qoǵamnan oqshaýlanady. Jas adamǵa aqsha kerek. Urlyqqa beıimdeledi, buzaqy toptarǵa qosylady. Nursultan Ábishuly osy keleńsiz jaǵdaılardyń aldyn alýdyń bir sharasy retinde tegin kásiptik-tehnıkalyq bilim berýdi usynyp otyr. «Mektep bitirip, oqýǵa túse almaı qalǵan jastardy birinshi jumysshy mamandyǵyn alýdy usynamyz. Úkimet ony júzege asyrýǵa kirissin», dedi. Bárimiz tastúıin bolyp bir jaǵadan bas, bir jeńnen qol shyǵarsaq, daǵdarys jeńil ótedi. Ulttyń uıaty ustazdar qaýymy osy toptyń basynda bolsa bolǵany. Gúlnáz О́TEI, Shymkent qosalqy mektep-ınternatynyń muǵalimi. Ońtústik Qazaqstan oblysy.