Ulttyq muraǵattaǵy ulaǵatty jıyn

Keshe Astanadaǵy Ulttyq muraǵat ǵımaratynda Qazaqstan Respýblıkasy Táýelsizdiginiń 25 jyldyǵyna arnalǵan Prezıdent N.Á.Nazarbaevtyń «Ult Jospary – qazaqstandyq armanǵa bastaıtyn jol» baǵdarlamalyq maqalasy aıasynda Memleket tarıhy ıns­tıtýty Ulttyq muraǵat jáne «Jas tarıhshylardyń respýblıkalyq qaýymdastyǵy» qoǵamdyq birlestiginiń uıymdastyrýymen «Memlekettiliktiń qalyptasýy men damýynyń qazaqstandyq joly: nátıjeler, jetistikter, bolashaǵy» atty respýblıkalyq ǵylymı-tájirıbelik konferensııa ótti. Mundaǵy negizgi áńgime qazaq­standyqtardyń tarıhı sanasyn qalyptastyrýdaǵy Pre­zıdent – Ult Kóshbasshysy N.Á.Nazarbaevtyń róli, memlekettiliktiń qalyptasý joly, ekonomıka men qoǵam damýynyń keleshegi, «Ult josparyna» qatysty máseleler boldy. Odan ary Táýelsiz Qazaq­standaǵy kópetnosty qoǵamnyń ómirlik qundylyǵy, egemen eldiń Konstıtýsııasy men zańdary jáne búkilhalyqtyq senim, mem­leketti kásibılendirýge qatysty ǵylymı tujyrymdar tilge tıek etildi. Sonymen qosa, zamanaýı kezeńdegi tózimdilik jáne ha­lyqaralyq yntymaqtastyqtaǵy adamı qatynastardyń ózekti tus­taryn, eýrazııalyq keńistiktegi yqpaldastyq baǵyttary men qazaqstandyq biregeılikti damy­­­­týdaǵy ǵylymı zerdeleý tájirıbeleri alǵa tartyldy. Shara aıasynda «Qazaqstan Respýblıkasynyń Táýelsizdigine – 25 jyl» atty qujatty kórme kópshilik kóńilinen shyqty. Kórmede Ulttyq muraǵat qorynan alynǵan, el táýelsizdiginiń alǵashqy kezeńinen bastap damýy men qalyptasý tarıhyn aıshyqtaıtyn qujattar qoıylǵan eken. Máselen, tuńǵysh zań jobalary, Qazaqstan astanasyn kóshirý men ataýyn ózgertý týraly qujattar men Elbasynyń ómiri, eńbek joly týraly tyń derekter vıdeo-fotoqujattar túrinde usynyldy. Aıta keteıik, taqyryp sheń­­­­be­rinde biraz másele qaýzal­dy. Qazaqstan Respýblıkasynyń Tuń­ǵysh Prezıdentiniń Qazaqstan memlekettiligin qalyptastyrý jáne nyǵaıtýdaǵy róli; Ult Kóshbasshysy jáne Táýelsiz Qazaqstannyń syrt­qy saıasaty (1991-2015 jj); Qazaq­stannyń Tuńǵysh Prezıdenti jáne eldiń ıntellektýaldyq ále­ýetin qalyptastyrý: ıdeıadan iske asyrý baǵyttary; Qazaqstan Respýblıkasy Prezıdentiniń qazaqstandyqtardyń tarıhı ózindik sanasyn qalyptastyrýdaǵy róli; Prezıdent N.Á.Nazarbaev jáne Qazaqstan Respýblıkasy­nyń memlekettik rámizderi; N.Á.Nazarbaevtyń eýrazııalyq ıdeıasynyń saıası fılosofııasy: qazaqstandyq damý joldarynyń negizi syndy máseleler qyzý talqyǵa tústi. Alqaly jıynda Memleket tarıhy ınstıtýtynyń dırektory Búrkitbaı Aıaǵan, Parlament Májilisiniń depýtaty Kamal Burhanov, Ulttyq muraǵattyń Bas dırektory Marat Ábsemetov, Táýelsiz Qazaqstannyń alǵashqy Syrtqy ister mınıstri, memleket qaıratkeri, dıplomat Tóleýtaı Súleı­menov tereń tolǵamdy áń­gimeler aıtty. Sodan soń Qazaq gýmanıtarlyq zań ýnıversıtetiniń oqytýshysy, saıasattaný ǵylym­darynyń doktory, professor Ábdijálel Bákirdiń «Máńgilik El» ıdeıasy – ultty uıystyrýdyń uly kúshi», Memleket tarıhy ınstıtýtynyń bólim bastyǵy, tarıh ǵylymdarynyń doktory Ǵanı Qarasaevtyń «Ult Kóshbasshysy N.Á.Nazarbaev jáne Táýelsiz Qa­zaqstannyń syrtqy saıasaty», Memleket tarıhy ınstıtýtynyń bas ǵylymı qyzmetkeri, tarıh ǵylym­darynyń doktory, professor Álıma Aýanasovanyń «Qazaqstandy jahandyq jańǵyrtýdaǵy Tuńǵysh Prezıdent N.Á.Nazarbaevtyń ró­li» atty jáne basqa baıandamalar mazmundylyǵymen erekshelendi. Shara sońynda Ulttyq muraǵat pen «Aljır» memorıaldy-mura­jaı kesheniniń ujymdaryna ıns­tı­týttyń kitaptary syıǵa tar­tylyp, Tarıh jáne qoǵamdyq ǵylym­dar akademııa­syna múshelikke qabyl­danǵandar quttyqtaldy. Raýshan TÁÝIRHANQYZY, jýrnalıst.