74 jastaǵy sportshy Rıo Olımpıadasyna qatysýǵa nıetti

ASTANA. 15 qańtar. Jetpis tórt jastaǵy japonııalyq shabandoz 2016 jyly Brazılııanyń Rıo-de-Janeıro qalasynda ótetin Olımpıada oıyndaryna qatysyp, baǵyn synaýǵa nıetti. Bul týraly TASS aqparat agenttigine silteme jasaǵan egemen.kz tilshisi habarlady. Japonııanyń At sporty federasııasy baspasóz qyzmetiniń málimdeýinshe, jasy 70-ten asqan sportshy Hırosı Hokesý irikteý kezeńine qatysý úshin ótinish te jibergen. Eger shabandoz qorytyndy boıynsha Rıo-de-Janeıro Olımpıadasyna joldama jeńip alatyn bolsa, Oıyndar tarıhyndaǵy eń jasy úlken sportshy atanbaq. Qazirgi tańda bul ataq shvesııalyq mergen Oskar Svanǵa tıesili. Ol 1920 jyly Belgııanyń Antverpen qalasynda ótken Olımpıadaǵa 72 jasynda qatysyp, kúmis medalǵa qol jetkizgen edi. Japon shabandozy Hırosı Hokesý Olımpıada oıyndaryna alǵash ret 1964 jyly týǵan eli – Japonııada qatysqan. Sportty janyna serik etken shabandoz osy ýaqytqa deıin úsh ret atalǵan dodaǵa qatysqan eken. Sońǵy ret 2012 jyly Londonda ótken alamanda baq synaǵan ol saıys kezinde 71 jasta bolǵan. Elaman Qońyr. Derek: TASS. Sýret: AP Photo.