Qytaı Aıdyń arǵy betine ǵarysh kemesin ushyrmaq

ASTANA. 15 qańtar. Qytaı 2018 jyly Aıdyń arǵy betine ǵarysh kemesin jiberýdi josparlap otyr. Bul týraly TASS aqparat agenttigine silteme jasaǵan egemen.kz tilshisi habarlady. Sapar barysynda aspan denesiniń geologııalyq qurylymyna zertteý jumystary júrgizilmek. Osy jospardy júzege asyrý úshin Qytaı eli Aıdy meńgerýdiń jańa satysyna daıyndyqty resmı túrde bastap ketti. Bul týraly Qytaı Halyq Respýblıkasynyń Qorǵanys ǵylymy, tehnıka jáne óndiris memlekettik basqarmasy málimdep otyr. Sınhýa aqparat agenttiginiń habarlaýynsha, 2018 jyly Aıdyń arǵy betine Chang'e-4 ǵarysh apparaty qonýy kerek. «Aıdyń bul beti gravıtasııalyq kúshtiń áserine baılanysty Jerden kórinbeıdi. Sol sebepti de osy ýaqytqa deıin ony meńgerý múmkin bolmaǵan edi. Chang'e-4 jospary osyndaı mindetti arqalaǵan adamzat tarıhyndaǵy tuńǵysh ekpedısııa bolyp tabylady», – dep málim etti basqarma janyndaǵy aıdy zertteý ortalyǵynyń basshysy Lıý Szınchjýn. Ortalyq basshysynyń sózine qaraǵanda, Qytaı osyndaı jobalarǵa qajetti joǵary dárejeli ǵylymı bilim men tehnologııany maqtanyshpen kórsete alady. 2013 jyly jeltoqsan aıynda Aıdyń betine jeńil qonǵan Chang'e-3 ǵarysh kemesi qazirgi ýaqytqa deıin Jerge aqparat taratyp keledi. Chang'e-4 te osyǵan uqsas qurylǵy bolǵanymen, onyń aýyr júktememen jumys isteýge múmkindigi mol. Bul ǵarysh sapary barysynda Aıdyń syrtqy betiniń geologııalyq qurylymyn zertteý josparlanyp otyr. Aldaǵy ýaqytta qytaı Chang'e-5-tiń kómegimen Aı orbıtasyna shyǵyp, sol jerge qonyp, modýldi Jerge qaıtaryp almaq. Bul apparatty jasaýdy qytaı mamandary qazirdiń ózinde bastap ketken. Chang'e serııalyq qurylǵylary qytaı mıfologııasyndaǵy aı qudaıdyń qurmetine oraı atalǵan. 2015 jyldyń basynda Qytaı ózge de elderdi ózderiniń ǵarysh jobalaryna qatysýy úshin shaqyrǵanyn atap ótken jón. Elaman Qońyr. Derek: TASS. Sýret: AP Photo.