«Barystyń» jeńisti joly

Burnaǵy kúni «Barys» komandasy Qurlyqtyq hokkeı lıgasy sheń­berinde óz aıdynynda Nıjnıı Nov­gorodtyń «Torpedosyn» qa­byl­dady. Tartysty ótken kezdesý nátıjesinde astanalyqtar 5:2 ese­­­bimen basym túsip, maýsymdaǵy 25-jeńisterine qol jetkizdi. Oıynnyń esebi birinshi kezeńniń sońǵy mınýtynda ashyldy. Naıdjel Doýs pen Brendon Bochenskı uıym­das­tyrǵan shabýylǵa nátıjeli núkte qoıǵan Dastın Boıd match­taǵy alǵashqy goldyń av­tory atandy. Bul kezde «Ba­rystyń» bir oıynshysy artyq bolǵanyn atap ótken jón. Ekinshi kezeńdi Andreı Nazarovtyń shákirtteri óte bel­sendi bastady. Nátıjesinde 25-mınýtta elordalyqtar eki birdeı shaıba soǵyp, esepti 3:0-ge jetkizdi. Atap aıtqanda, aldymen Maık Landın kezekti ret oıynshy basymdyǵyn jú­zege asyrsa, arada 45 sekýnd ótkende, Konstantın Romanov mergendigimen kózge tústi. Alaı­da, qonaqtar ekinshi úziliske deıin esepti bir shaıba aıyrmasyna qysqartýǵa múmkindik tapty. 31-mınýtta Artem Alıaev oıynshy basymdyǵyn paıdalanyp, komandasynyń alǵashqy golyn soqty. Al kezeńniń sońǵy mınýtynda Maksım Osıpov «Barys» qaqpashysy Iаn Lasodan aılasyn asyrdy. Sońǵy kezeń taǵy da bizdiń komandanyń goly­men bas­taldy. Úshinshi ret oıynshy ba­sym­dyǵyn sátti paıdalanǵan «Barys» hokkeı­shileri Kons­tantın Pýshkarevtiń kómegimen qarsylastar qaqpasyna tór­tinshi shaıbany engizdi. Tar­tysty kezdesýdiń núktesi 57-mı­nýtta qoıyldy. Bos qaq­pa­ny dál kózdegen Dastın Boıd dýbldiń avtory atanyp qana qoımaı, komandasyn aıqyn jeńiske jetkizdi. Búginde 51 oıynnan 75 upaı jıǵan «Barys» Shyǵys konferensııasynda 7-orynda keledi. Komanda kelesi kezdesýin 19 qań­tarda Astanada Mınskiniń «Dınamosymen» ótkizedi. Elaman Qońyr, «Egemen Qazaqstan».