Ýaqyt talabynan týǵan mindet

Parlament depýtattarynyń kezekten tys Parlament Májilisi jáne barlyq deńgeıdegi máslıhattar depýtattary saılaýlaryn ótkizý jóninde Elbasynyń atyna úndeý qabyldaǵany belgili. Osy úndeý Memleket basshysy tarapynan qoldaý taýyp otyr. Soǵan sáıkes respýblıka Prezıdenti Nursultan Nazarbaev kezekten tys Parlament jáne barlyq deńgeıdegi máslıhattar saılaýlaryn ótkizý jónindegi Jarlyqqa qol qoıdy. Zańdy kúshi bar bul qabyrǵaly qujat búgingi ýaqyt talabynan, búgingi atqarylatyn isti erteńgi kúnge qaldyrmaý qajettiliginen týyndaǵany belgili. Osyǵan baılanysty biz keshe keshke Qazaqstan halqy Batys Qazaqstan oblystyq assambleıasy tóraǵasynyń orynbasary, «Dos» qoǵamdyq qorynyń tóraıymy V.K.ShOHINANY telefon arqyly sózge tartqan edik. – Vera Kýzmınıchna, Prezıdent Jarlyǵynyń máni men mańyzyn qalaı túsinesiz? – Jarlyqqa qol qoıylýyn tolyǵymen qoldaımyn. Mundaı qadam aýqymdy ekonomıkalyq jaǵdaılarǵa jáne qazirgi kezeńniń kúrdeliligine baılanysty bolyp otyrǵany sózsiz. Qazirgi kúni Ult Josparynyń prak­tı­kalyq kezeńi bas­talyp ta ketti. Soǵan oraı daǵdarysqa qarsy sharalardy ýaqtyly júzege asyrý úshin Parlament Májilisi jáne barlyq deńgeıdegi máslıhattar de­pýtattarynyń saılaýlaryn jedel túrde ótkizý qajettiligi týyndady. Elbasy atyna Parlament depýtattarynyń úndeý qabyldaýynyń basty syry da osynda. Atalǵan saılaý óz ýaqyty boıynsha alǵanda aldaǵy kúzge belgilengeni belgili. Biraq álemdik ekonomıkalyq ahýaldyń qıyndaýyna baılanysty memleket tarapynan jedel is-sharalar alý qajettiligi týyndady. Solaı boldy da. Munyń basty kórinisi Elbasy Jarlyǵynyń jarııalanýy bolyp tabylady. Elbasy «Ult Jospary – qazaqstandyq armanǵa bastaıtyn jol» atty maqalasynda memleketimiz ben qazaqstandyqtardyń ekonomıkalyq daǵdarystyń yqpalyn qatty sezinbeýi jáne respýblıkamyz barynsha damyǵan otyz eldiń qataryna kirý baǵytyndaǵy maqsatyna jetýi úshin tıisti mindetterdi aıqyndap berdi. Depýtattar men Elbasy osynyń bárin eskerip búgingideı qadamǵa baryp otyrǵany anyq. Aldaǵy ýaqytta saılanatyn depýtattar korpýsynyń jańa quramy el ekonomıkasyn jáne basqa da áleýmettik-mádenı salalardy jańǵyrtýǵa tyń serpin bere alatynyna senimimiz mol. Jazyp alǵan Temir QUSAIYN, «Egemen Qazaqstan».  Batys Qazaqstan oblysy.