Iozef Blatter FIFA prezıdenti bolyp qalýy múmkin

ASTANA. 28 qańtar. Sport arbıtrajdy soty Halyqaralyq fýtbol federasııasynyń (FIFA) prezıdenti Iozef Blatterdiń apellıasııasyn qanaǵattandyrsa, jemqorlyq daý-damaıyna jáne fýtbolǵa qatysty is-áreketterden 8 jylǵa shettetilgenine qaramastan, ol óz qyzmetinde qalýy múmkin. Bul týraly TASS aqparat agenttigine silteme jasaǵan egemen.kz tilshisi habarlady. Shveısarııanyń Sport Information agenttiginiń málimdeýinshe, eger sot Blatterdiń paıdasyna úkim shyǵarsa, 26 aqpanǵa josparlanǵan FIFA prezıdentin saılaý is-sharasy zańdy kúshin joıady. «Ázirge Iozef Blatter otstavkaǵa ketken joq. Sondyqtan FIFA jarǵysyna sáıkes jańa prezıdenttiń saılanýy múmkin emes», – dep jazady atalǵan agenttik. Sonymen qatar, jemqorlyqqa qarsy Transparancy International uıymynyń ókili Sılvııa Shenk te Germanııanyń Sport Bild jýrnalyna bergen suhbatynda bul máselege nazar aýdardy. Ol FIFA-nyń aqpanda ótetin kongresinde Blatterdi qyzmetinen bosatýdy kún tártibine engizý kerektigin aıtyp: «Eger Arbıtrajdy sot Blatterdi aqtap shyqsa, jańadan saılanǵan prezıdenttiń barlyq sheshimderi negizsiz bolady», – dedi. Ázirge 26 aqpanda ótetin jıynda bul másele qarastyrylatyny týraly eshqandaı aqparat taraǵan joq. Sondaı-aq, mamandar Blatterdiń de óz erkimen qyzmetinen ketý jóninde ótinish jazýy ekitalaı ekenin aıtyp otyr. Bir sózben aıtqanda, ol sottyń sheshimin kútip, soǵan deıin ózi prezıdent bolyp qala beredi. Elaman Qońyr. Derek: TASS. Sýret: rbc.ua.