Jambyl oblysynda bala sabaqta omyrtqasyn syndyryp aldy

TARAZ. 28 qańtar. Jambyl oblysynda bir oqýshy sabaq kezinde omyrtqasyn syndyryp aldy. Bul týraly nur.kz saıtyna silteme jasaǵan egemen.kz tilshisi habarlady. Bul oqıǵa Sarysý aýdanynyń ortalyǵy Jańatas qalasyndaǵy Abylaı han orta mektebinde bolǵan. nur.kz saıtynyń jazýyna qaraǵanda dál qazir 13 jastaǵy oqýshy Dııas omyrtqasyn jaraqattap, Sarysý aýdandyq ortalyq aýrýhanasynda jatyr. Balanyń ata-anasy bul oqıǵaǵa tarıh pániniń muǵalimin kinálap otyr. «Meniń balam sabaq ústinde jaqyn partada otyrǵan bir oqýshy qyzdan qalam surap, ornynan turyp barǵan. Muǵalim oqýshynyń ornyna otyrýyn talap etip, artynsha Dııasty qatty ıterip jiberedi. Oqýshy ońbaı qulaǵan», deıdi balanyń anasy Gúljanar. Dárigerler jas balanyń omytqasy synǵan degen dıagnoz qoıyp otyr. Dııas qazir ornynan turyp, júre almaıdy. Tipti ómir boıy arbaǵa tańylyp, múgedek bolyp qalý qaýpi de joq emes. «Bizdi Taraz qalasyna tomografııaǵa túsýge jiberdi. Al, osy iske kináli muǵalim eshteńe bolmaǵandaı jaıbaraqat jumysyn jalǵastyryp júr. Ol tipti aýrýhanadaǵy balamnyń jaǵdaıyn surap, birde-bir márte kelgen joq. Mektep dırektory da únsiz. Aýdandyq ishki ister bólimine shaǵymdanyp, aryz jazdym.  Budan basqadan qaıran bolmaı tur. Dııastan keıin 6 jasar balam bar, jan-jaqqa izdenýge múmkindik joq», deıdi anasy Gúljanar. Sarysý aýdandyq jergilikti polısııa qyzmetiniń jetekshisi Renat Baıbekov bul boıynsha qylmystyq is qozǵalyp, tergeý jumystary júrip jatqanyn aıtady. Sot-medısınalyq saraptamasy taǵaıyndalǵan. Tergeý qupııasyna baılanysty basqa eshqandaı málimet bere almaıdy. Oralhan Dáýit. Derek, sýret: nur.kz