Qostanaıda kásipker sotta óz quqyǵyn qorǵap shyqty

QOSTANAI. 28 qańtar. Jitiqara aýdanyndaǵy kásipker Ǵalııa Shúrenova jolaýshylar kóligi jáne avtomobıl joldary oblystyq basqarmasyn sotqa berip, óziniń kásibimen aınalysý quqyn qorǵap qaldy jáne 2,4 mıllıon teńge shyǵynyn qaıtaryp alatyn boldy. Bul týraly egemen.kz tilshisi habarlady. Ǵalııa Shúrenova shalǵaıda jatqan Jtiqara aýdany men Qostanaı qalasyna jolaýshylar tasymalymen on jyldan beri aınalysyp keledi. Bul maqsatqa ol avtobýs jaldaıdy jáne óz kóligin paıdalanady. 2014 jyly jolaýshylar tasymaly jáne avtomobıl joldary oblystyq basqarmasy kásipkermen «Qostanaı-Zabelovka» baǵytynda jolaýshylar tasymaldaý qyzmetin kórsetýge kelisim-shartty úzedi. Ondaǵy syltaýy júrgizýshiler baǵyttyń sońyna deıin barmaıdy, jolaýshylar shaǵymy bolǵandyǵyn kóldeneń tartqan. Alaıda, kásipker mundaı dálelmen kelispeı, istiń shyn kórinisin dáleldeý jáne óz bıznesin qorǵaý úshin oblystaǵy kásipkerler palatasynan keńes suraı otyryp, memlekettik organnnyń zańsyz áreketine qarsy sotqa júgindi. Kásipker Ǵalııa Shúrenova: «Alǵashynda jolaýshylar tasymaly jáne avtomobıl joldary basqarmasyna baryp, jaǵdaıdy túsindirdim. Jolaýshylardyń shaǵym jasaǵany ótirik. Basqarmadaǵylar menimen sóılespedi de. Olar búginde tenderdi de durys ótkizbeıdi, adamnyń shaǵymyn, pikirin tyńdamaıdy. Olar bizdi naryqtan ysyryp tastaǵysy keldi. Meniń bar amalym palata men sotqa barý ǵana boldy», – dedi tilshige telefon arqyly. Kásipker basqarmany sottyń úsh satysynda da jeńip shyqty. Ǵalııa Shúrenova Kásipkerler palatasynyń keńesimen jumyssyz qalǵan ýaqytyndaǵy ketken shyǵyndy óndirip alý úshin memlekettik organdy ekinshi ret sotqa berdi. Sot shyǵyndy eseptep, 2,4 mıllıon teńgeni kásipker paıdasyna qaıtaryp berýge sheshim shyǵardy. Sot sheshimi áli kúshine engen joq. Názıra Járimbetova. Derek, sýret: egemen.kz.