Memleketpen birge jetilgen qyzmet

Keshe «Nazarbaev Ýnıversıtettiń» «Senat holl» zalynda el Táýelsizdiginiń 25 jyldyǵyn keń kólemde atap ótý maqsatynda Qazaqstan Respýblıkasynyń Memlekettik qyzmet isteri mınıstrliginiń bastamasymen «N.Nazarbaev jáne memlekettik qyzmettiń qazaqstandyq modeli» taqyrybynda halyqaralyq ǵylymı-tájirıbelik konferensııa uıymdastyryldy. Is-sharany «Nazarbaev Ýnıversıtet» BUU DB (Birikken Ulttar Uıymynyń Damý baǵdarlamasy) jáne Eýropalyq odaq ókildigimen birlesip ótkizdi. Konferensııany ashqan Mem­lekettik qyzmet isteri mınıstri Talǵat Donaqov alǵashqy sóz­di Prezıdent Ákimshiligi Bas­shy­synyń orynbasary Marat Beketaevqa berdi. Minberge kóte­rilgen sheshen: «Elbasy­myz Nursultan Nazarbaev Ult Jospa­ry – qazaqstandyq armanǵa bas­taıtyn jol» atty baǵdarlamalyq maqalasynda 2016 jyldyń 1 qań­tary 5 ınstıtýttyq reformany júzege asyrý boıynsha «100 naqty qadam» Ult Josparyn oryndaý­dyń praktıkalyq kezeńiniń bastalýy dep atap ótken bolatyn. Memleket basshysy aıtqandaı, memlekettik apparattyń tıimdiligin arttyrý jáne memleketti kásibılendirý Ult Josparyn júzege asyrýdyń asa mańyzdy bólshegi», dedi ol. Ári qaraı ol atalǵan jumys­tardyń Memlekettik qyzmet týraly alǵashqy zań qabyldanýynyń 20 jyldyǵymen tuspa-tus kelgenine jáne bul jumystyń elimizde ǵana emes, postkeńestik keńistiktegi mem­lekettik qyzmettegi alǵashqy reforma bolǵanyna toqtaldy. Al búgingideı álemdegi asa damyǵan elderdiń alǵashqy otyzdyǵyna ený jaıly keýdeli maqsattar qoıǵan tusta memlekettik apparattyń tıimdiligin arttyryp, memleketti kásibılendirý óte mańyzdy, is degen M.Beketaev olardy júzege asyrýdyń negizi elimizde berik qalyptasqanyn atap kórsetti. Munan soń konferensııaǵa moderatorlyq etýshi mınıstrdiń ózi minberge kóterildi. T.Donaqov oıyn bylaısha jalǵady. Álem­dik turǵyda aldyńǵy qatarly ozyq elderdiń tájirıbelerinen baıqaǵanymyzdaı, memlekettiń qýattylyǵy ondaǵy kadrlardyń bilimi men biligine tikeleı baılanysty. Al Qazaqstannyń El­basy Nursultan Nazarbaevtyń basshylyǵymen bul turǵyda júıeli de maqsatty kóp ister tyndyrǵanyn tilge tıek etken mınıstr búgingi kúni alǵa qoıylyp otyrǵan mindetterge de toqtaldy. Reformany júzege asyrýdyń eń bir mańyzdy tusy azamattardyń memlekettik qyzmetke degen se­nimi artýy ekenin alǵa tartyp, konferensııaǵa qatysýshylarǵa praktıkalyq qadamdar jasaýda paıdasy tıetin oılarymen erkin bólisýdi surady. Mınıstr sózinen soń, mem­lekettik qyzmet tarıhynda eki ret osy salanyń basshysy bolyp qyzmet atqarǵan, al búgin konferensııaǵa «Nur Otan» partııasynyń hatshysy retinde qatysyp otyrǵan Zaýytbek Turysbekovke sóz kezegi berildi. Memlekettik qyzmettiń jańa mo­deliniń qalyptasý kezeńderiniń tarıhyn sholyp ótken ol búgingi kúni 5 ınstıtýttyq reformadaǵy «100 naqty qadamnyń» 15-iniń osy memlekettik qyzmet pen mem­leketti kásibılendirýge arna­lýynyń óte mańyzy zor ekenine jınalǵandardyń nazaryn aýdardy. Memlekettik qyz­mettegi jańa reformalar bo­ıynsha qyzmette ósý, qabileti men qarymyn esepke alǵan jańa jalaqy tóleý júıesin engizý syndy jańalyqtardyń sonylyǵyna nazar aýdardy. Al osyndaı maqsatty da júıeli júrgizilgen jumystardyń mem­lekettik qyz­metti jańa sapalyq deńgeıge kóte­retinine senimdi ekenin de aıtyp ótti. Moderator kelesi kezekte minberge shaqyrǵan BUU-nyń Qazaqstandaǵy turaqty ókili No­rımasa Shımomýra, elimizdegi EO ókili Jan-Lýı Lavroff merıtokratııa jáne qyzmettik ádep, sybaılas jemqorlyqpen kúrestegi saýyqtyrý sharalarynyń mańyzy jaıynda oılarymen bólisti. Azdaǵan úzilisten soń jumy­syn qaıta jalǵaǵan konferen­sııada jańa zamanaýı baılanys júıesi qyzmet etti. Beıne­kon­fe­rensbaılanys tár­tibinde konferensııa baıandamashylary bolyp Lı Kýan Iý atyndaǵy Sıngapýr Ulttyq ýnıversıteti memlekettik saıasat mektebiniń vıse-dekany, professor Edýardo Araral (Sıngapýr), Kornel ýnıversıteti quqyq mektebiniń professory Charlz Ýaııthed (AQSh) sóz sóı­lep, ári qaraı konferensııa kún tártibine sáıkes úsh seksııalyq otyrys sheńberinde jalǵasyn tapty. Onyń alǵashqysy – «Qazaqstan Respýblıkasy Prezıdentiniń 1995 jylǵy 26 jeltoqsandaǵy «Memlekettik qyzmet týraly» Jarlyǵy – Táýelsiz Qazaqstannyń memlekettik qyzmettiń zamanaýı júıesin ınstıtýttandyrýdyń bas­taýy» taqyrybyn qaýzasa, ekinshisi – «Qazaqstan Respýblıkasynyń Tuńǵysh Prezıdenti – Elbasy memlekettik qyzmettegi merıtokratııa qaǵıdalaryn tıimdilikterin, nátıjelilikterin jáne ashyqtyǵyn qalyptastyrýdy qamtamasyz etýshi» máselelerin, úshinshisi – «Zamanaýı memlekettik apparat qalyptastyrý boıynsha Memleket basshysynyń ınstıtýttyq reformasy» taqyryby tóńireginde órbip, professorlar Zınaıda Fedotova, Marat Qoǵamov, Qarjy mınıstrliginiń jaýapty hatshysy Natalıa Korjova, «Nazarbaev Ýnıversıtettiń» joǵary saıa­sat mektebiniń dekany Hýeı Veng Tat sııaqty konferensııa­ǵa qatysýshylardyń pikirlerimen tuzdyqtaldy. Konferesııaǵa qatysýshylar biraýyzdan: Qazaqstan Res­pýblıkasy Prezıdentiniń zań kúshi bar Jarlyqtary Qazaqstannyń zamanaýı quqyqtyq júıesiniń, onyń ishinde memlekettik basqarýdyń jáne memlekettik qyzmettiń ne­gizin qalady; Táýelsizdik jyl­dary el Prezıdentiniń naq­ty baǵyt ustanýynyń arqa­synda úzdik halyqaralyq tá­jirıbege negizdelgen zamanaýı ınfraqurylym jáne sapaly, qoljetimdi memlekettik qyzmetter kórsetý júıesi qa­lyptasty; Tuńǵysh Prezıdent – Elbasy N.Á.Nazarbaev bekitken «Bolashaq» baǵdarlamasy jańa pishimdegi basqarýshylardy qa­lyptastyrýdyń generatory bola bildi jáne solaı qala ber­mek, – degen qorytyndyǵa kelip, konferensııaǵa qatysqan halyqaralyq sarapshylar mem­lekettik qyzmet týraly jańa zań­namanyń kadrlardy irikteý men ósirý kezinde, personaldy basqarý jáne etıkany baqylaýdy kúsheıtý ınstıtýttary men tetik­terin jetildirýde merıtokratııa qaǵıdattaryn kúsheıtýdi qam­tamasyz etetinin joǵary baǵalady. Olar, sondaı-aq, zamanaýı jáne kásibı memlekettik apparat qalyptastyrýda júzege asyrylyp jatqan ınstıtýttyq reformanyń Qazaqstandy ári qaraı damyta túsedi dep esep­teıtinderin aıtty. Anar TО́LEÝHANQYZY, «Egemen Qazaqstan».