Qazaqstandyqtarǵa zıka bezgegine qarsy eskertý jasaldy

ASTANA. 30 qańtar. Tutynýshylar quqyǵyn qorǵaý komıteti qazaqstandyqtarǵa Ońtústik Amerıka elderine taraǵan zıka indetine asqan saqtyqpen qaraýdy eskertedi. Bul týraly tengrinews.kz saıtyna silteme jasaǵan egemen.kz tilshisi habarlady. Dúnıejúzilik densaýlyq saqtaý uıymy qaýipti indettiń 2015 jyly sáýir aıynda Brazılııa memleketinde bastalǵanyn resmı túrde habarlady. Osydan soń, Ońtústik Amerıkanyń ózge de elderine taraǵan. Zıka indeti 27 qańtar kúni álemniń 27 eline taraǵany belgili boldy. Olar: Barbados, Bolıvııa, Brazılııa, Kabo-Verde, Kolýmbııa, Ekvador, Salvador, Fıdjı, Fransýz Gvıanasy, Gvadelýpa, Gaıana, Gaıtı, Gondýras, Maldıv, Martınıka, Meksıka, Jańa Kaledonııa, Panama, Paragvaı, Pýerto-Rıko, Sen-Marten, Samoa, Solomon araldary, Sýrınam, Taıland jáne Venesýela. Zıka indeti kóbine qaýipti vırýs juqtyrǵan jándikter men torpıkalyq aımaqtarda ómir súretin masalar arqyly juǵady. Adamdar arasyndaǵy juqpaly aýrýlardyń qataryna jatpaıdy. Dene qyzýy, titirkenýi, býyn arasyndaǵy jaısyzdyq, bas aýrýlary indettiń negizgi belgileri bolyp esepteledi. Zıka ásirese júkti áıelder úshin asa qaýipti. Júktiliktiń alǵashqy 12-16 aptasynda juqtyrǵan bolashaq anadan mıkrosefalııamen aýyrǵan náreste dúnıege keledi. Mıkrosefalııa sábıdiń bas súıegi men mı qurylysynyń damýyna keri áserin tıgizedi. Bul kezde arnaıy vaksınalar esh kómektespeıdi. Tutynýshylar quqyǵyn qorǵaý komıteti qazaqstandyqtardyń shetelge barǵan kezderinde osy máselege asqan saqtyqpen qaraýdy eskertti. Lajy bolsa, qaýiptiń beti qaıtqansha, shetelge barmaǵandary jón ekenin alǵa tartty. «Shetelge barǵan qazaqstandyqtar aýrý taratqysh masalardan qorǵanyp, jabyq kıimder kıgeni jón. Las aımaqtardan alys bolyp, qonaq úılerde tek salqyndatqyshty ǵana paıdalanýlary qajet. Qazaqstanǵa kelgennen keıin aýrý belgileri bilingen bolsa, ýaqyt sozbaı dárigerler kómegine júgingenderi jón», – deıdi tutynýshylar quqyǵyn qorǵaý komıteti. Aıan Ábdýálı. Derek: tengrinews.ru. Sýret: livemint.com.