Kandıdattar qatary artyp keledi

Keshe Ortalyq saılaý komıssııasynda OSK hatshysy Baqyt Meldeshov jýrnalısterge brıfıng ótkizip, barlyq deńgeıdegi máslıhattar depýtattyǵyna kandıdattardy usyný barysymen tanystyrdy. Oblystyq, Astana jáne Al­maty qalalarynyń aýmaqtyq saılaý komıssııalary usynǵan málimetterge sáıkes, 2016 jylǵy saǵat 10.00-degi jaǵdaı boıynsha respýblıkada máslıhattar depýtattyǵyna barlyǵy 1050 kandıdat usynylǵan. Olardyń ishinde 107-si oblystyq, Astana jáne Almaty qalalyq máslıhattaryna, 804-i aýdandyq máslıhattarǵa, 139-y qalalyq máslıhattarǵa usynylyp otyr. Al eki kandıdatty saıası partııalar, 1048 kandıdat ózin-ózi usynǵan. «Usynylǵan kandıdattardyń basym kópshiligi, naqty aıtqanda, Sol­tústik Qazaqstan oblysynan 239 adam, Qaraǵandy – 197 adam, Shyǵys Qazaqstan – 132 adam jáne Qostanaı oblysy­nan 95 adam usynyldy. Usynylǵan kan­dı­dattardyń 5-eýi saıası par­tııa­lardyń músheleri, 553-i partııada joqtar, taǵy 492-si óziniń partııaǵa tıesili ekenin kórsetpegen», – dedi B.Meldeshov. Usynylǵan kandıdattardyń arasynda 16 ulttyń ókili bar. Úmitkerlerdiń 693-i er adamdar, 357-si áıelder, ortasha jasy – 41 jas. «720 kandıdattyń joǵary bilimi, 257 kandıdattyń arnaýly orta jáne 72 kandıdattyń orta bilimi bar, – dedi OSK hatshysy. – Kandıdattardyń 56 paıyzy memlekettik mekemelerde, uıymdarda jáne kásiporyndarda, 38 paıyzy kommersııalyq qury­lymdarda jumys isteıdi, 6 paıyzy basqa kásippen aınalysady». Keshegi kúnge deıin okrýgtik saılaý komıssııalary 28 kandıdatty tirkepti. Al Ortsaılaýkom bekitken kúntizbelik josparǵa sáıkes máslıhattar depýtattyǵyna kandıdattardy usyný 2016 jylǵy 19 aqpanǵa, al tirkeý 23 aqpanǵa deıin júrgiziledi.