sheteldikter tarapynan joǵary baǵalanyp otyr
Keshe Astanadaǵy Ulttyq akademııalyq kitaphanada Qazaqstan halqy Assambleıasy Tóraǵasynyń orynbasary – Hatshylyq meńgerýshisi Eraly Toǵjanovtyń Rýmynııa Parlamentiniń depýtaty, Rýmynııa Demokratııalyq lıberaldyq partııasynyń múshesi Ionash-Florın Ýrkanmen kezdesýi bolyp ótti.
Kezdesý barysynda eki el arasyndaǵy mádenıetaralyq únqatysýdy odan ári damytý máseleleri, gýmanıtarlyq ózara is-qımyldyń mańyzdy baǵyttary talqylandy. Kezdesýge qatysýshylar QHA-nyń halyqaralyq seriktestigi sheńberinde is-qımyl jasaý, qoǵamdyq kelisim men jalpyulttyq birliktiń qazaqstandyq úlgisiniń erekshelikteri máseleleri týraly pikir almasty.
Prezıdent Nursultan Nazarbaevtyń etnosaralyq jáne konfessııaaralyq kelisiminiń modeli BUU, EQYU sııaqty asa bedeldi halyqaralyq uıymdarda talqylanyp, qoldaýǵa ıe boldy. Búgingi kúni bul model týraly bilgisi keletinder, onyń kóptegen qyrlaryn zerttegisi keletinder kóp. Tek ótken jyly ǵana men osy máselemen sheteldik 24 delegasııany qabyldap, kelissóz júrgizdim, dedi Eraly Toǵjanov kezdesý barysynda.
О́z tarapynan meıman da bul iske qyzyǵýshylyq bildiretinin jetkizdi. Men sizderdiń etnosaralyq baǵytta júrgizip jatqan jumystaryńyzben QHA-da tanysa kelip, bul tarapta az jumys istelmegenine kóz jetkizdim. Osy jumystyń bári Qazaqstan halqynyń tynyshtyǵy men turaqtylyǵyn saqtaýǵa arnalyp otyrǵany aıqyn ańǵarylady, dedi ol. Sóziniń qorytyndysynda I-F.Ýrkan etnosaralyq kelisimdi qamtamasyz etýdegi Qazaqstannyń oń tájirıbesi basqalarǵa úlgi bolatynyn atap kórsetip, Prezıdent N.Nazarbaevtyń júrgizip otyrǵan beıbitshilik pen kelisim saıasatyn Rýmynııanyń joǵary baǵalaıtynyn aıtyp ótti.
Qazaqstan men Rýmynııa arasyndaǵy parlamentaralyq baılanystar nyǵaıa túsýde. Eki eldiń parlamenttik delegasııalary bir-birine qatynasyp, ózara yntymaqtastyq ornatqanyna birshama jyl boldy. Bul eki eldiń ekonomıkalyq yntymaqtastyǵyna óris ashatyn qadamdar bolsa, mádenıetaralyq baılanystar qazirgi ýaqytqa deıin tipti jandana túsken. Byltyrǵy jyldyń aıaǵynda ǵana Sháken Aımanov atyndaǵy «Qazaqfılm» kınostýdııasy Qazaqstannyń Rýmynııadaǵy elshiligi men «KMG Interneshnl» kompanııasynyń qoldaýymen Býhareste 4 kúnge sozylǵan kınofestıval ótkizip keldi. Festıvalǵa aparǵan kartınalardyń arasynda «Elbasy joly», «Balalyq shaǵymnyń aspany» atty N.Nazarbaev ómirine arnalǵan kınofılmder de alǵashqy kúni kórsetildi. Al kınoepopeıanyń basqa bólimderi kelesi kúnderi usynyldy. Sonymen qatar, qazaqstandyq tanymal kınorejısserlerdiń ár jyldary túsirilgen 9 kınofılmi rýmynııalyq kórermenderdiń nazaryna usynylyp, ózderiniń laıyqty baǵasyn aldy.
Býhareste qazaqstandyq kınofestıvaldiń ótkizilýi eki el arasyndaǵy mádenı yntymaqtastyqtyń dástúrin odan ári tereńdete tústi. Al oǵan deıin qazaqstandyq ónerpazdar Rýmynııada jyl saıyn ótkizilip turatyn Dj.Eneský atyndaǵy klassıkalyq mýzykanyń festıvaline qatysyp otyratyn. Olardyń arasynda pıanıst Ámir Tebenıhın, skrıpkashy Jibek Músirǵalıeva jáne t.b. bolǵan edi. Al byltyrǵy 5 jeltoqsanda Býhareste skrıpkashy Arman Myrzaǵalıev óner kórsetti.
Jaqsybaı SAMRAT,
«Egemen Qazaqstan».
