Úgit zańmen úıleskende utymdy

Qostanaı oblystyq saılaý komıssııasy semınar-keńes ótkizdi Elimizde Parlament Máji­lisi men barlyq deńgeıdegi máslı­hattar depýtattarynyń saılaý­laryn ótkizý naýqany bastalyp ketti. Álemdi alańdatyp otyr­ǵan daǵdarys kezinde kezekten tys saılaýdyń ótýine ekono­mı­kalyq únem jáne saıası berik­tilik turǵysynan túsinistikpen qarap otyrǵan saılaýshylar úshin osy saıası naýqannyń asa demokratııalyqpen, móldirlikpen, ashyqtyqpen ótýiniń mańyzy zor. Sondyqtan oblystyq saılaý komıssııasynyń tóraıymy Anto­nına Markova semınar-keńeste túrli deńgeıdegi buqaralyq aqparat quraldarynyń ókilderine saıası naýqannyń barysy jáne ony júrgizýdiń bekitilgen erejeleri týraly taǵy da aıtyp berdi. Antonına Mıhaılovna saıası naýqan bastalysymen-aq jýrnalıstermen osy taqyrypta brıfıng ótkizgen bolatyn. – Saılaýshylarǵa da, saılanatyn azamattarǵa da aqparat negizinen gazetter men telearnalar arqyly jetedi. Sondyqtan saılaý naýqanynda saılaýshylar túsine almaı qalǵan, qate túsinip qal­ǵan sátter bolmaýy tıis. Sol úshin jýrnalısterdi, ıaǵnı respýb­lıkalyq jáne jergilikti buqa­ralyq aqparat quraldary ókilderin taǵy da bir jınaýdy jón kórdik. Jurtshylyqtyń saıası belsendiligi óte joǵary, – deıdi Antonına Markova. Máslıhattarǵa kandıdattar usyný 20 qańtar men 19 aqpan arasynda júretindigi belgili. Búginge deıin oblysta túrli deńgeıdegi máslıhattarǵa usynylǵan úmitkerlerdiń sany 600-ge jetken. Onyń ishinde 67 adam – oblystyq máslıhatqa, 407 adam – aýdandyq, 126-sy qalalyq máslıhattarǵa depýtat bolǵysy keledi. Olardyń barlyǵy da ózin ózi usynǵan. Úmitkerlerdiń 33 paıyzdan astamy áıelder, 11 ulttyń ókili. – Munyń ózi túrli deńgeıdegi máslıhattarǵa kandıdattar usyný jalǵasa beretinin bildiredi. Áli ýaqyt bar. Sondaı-aq, «Nur Otan», «Aq jol», «Aýyl», «QKHP» partııalary jáne taǵy basqa saıası partııalar máslıhattarǵa óz kandıdattaryn usynýǵa daıarlaýda, – dedi Antonına Markova. Semınar-keńeste jınalǵandar tarapynan oblystyq saılaý komıssııasy múshelerine berilgen saýaldardyń basym kópshiligi máslıhattarǵa úmitkerlerdiń saılaýaldy úgit jumystaryna baılanysty boldy. О́ıtkeni, halyq saılaýda eli, Otany úshin aıanbaı qyzmet etetin qalaýlysyn qalt jibermeı tańdap alýy tıis. Ol úshin saılaýaldy úgit jumystary zań aıasynan shashaý shyqpaıtyndaı, ádil, móldir bolýy tıis. Qazir aqparat taratýǵa gazetter men telearnalar, radıodan bólek ınternet-resýrs qosyldy. Osyǵan oraı da saılaý komıssııasy músheleri kóptegen suraqtarǵa jaýap berdi. Kandıdattardyń saılaýaldy úgit jumysynda zańmen bekitilgen jáne soǵan oraı eskerýdi qajet etetin máseleler jetkilikti. Semınarda solardyń barlyǵyn oblystyq saılaý komıssııasy músheleri jýrnalısterge jete túsindirdi. Saılaýda saılaýshylar da, saılanýshylar da túsinbeı qalǵan másele bolmaıdy. Sonda ǵana demokratııa saltanat qurmaq. Názıra JÁRIMBETOVA, «Egemen Qazaqstan». QOSTANAI.