Bir kúnde eki balabaqsha ashyldy

Oblys ortalyǵynda sońǵy jyldary mektepke deıingi balalar mekemeleri kóptep salynýda. Jaqynda qalada eki birdeı balabaqshanyń paıda­lanýǵa berilýi – sonyń aıqyn dáleli. «Shattyq» pen «Dýman» balabaqshalarynda 400-ge jýyq balapan tárbıelenetin bolady. «Zarechnyı-1» turǵyn aýdanynda boı kótergen №48 «Shattyq» balabaqshasynyń ashylý saltanatyna qatysqan qala ákimi Bekbol Saǵyn turǵyndardy paıdalanýǵa berilgen áleýmettik nysannyń ashylýymen qut­tyqtap, jyly lebizin bildirdi. Ol Elbasynyń tapsyrmasymen Aqtóbede taǵy bir balabaqsha iske qosylǵanyn, «Máńgilik El» bo­lamyz dep aldyna úlken murat qoıyp otyrǵan memleketimizde jas urpaqtyń tár­bıesine úlken mańyz berilip otyrǵanyn jet­kizdi. Qazaqtyń uly jazýshysy Muhtar Áýe­zovtiń «El bolamyn deseń, besigińdi túze» degen ataly sózin tilge tıek ete kelip, Elbasy Nursultan Nazarbaevtyń 2020 jylǵa deıin elimizdegi 3-6 jastaǵy baldyrǵandardy to­lyqtaı balabaqshamen qamtýdy mindettegenin atap ótti. Qazirdiń ózinde Aqtóbe qalasyndaǵy 3-6 jastaǵy balalardyń balabaqshamen qamtylý deńgeıi 80 paıyzdan asqanyn bul saladaǵy jetistik retinde baǵalady. Ata-ana­lar atynan sóz alǵan Gúlnar Sarıeva ba­­la­­­baqshanyń ashylýyna uıytqy bolǵany úshin Elbasyna jáne jergilikti bılikke rızashylyǵyn bildirdi, elimizdiń gúldene berýine izgi tilegin arnady. Balabaqsha qurylysyna jergilikti bıýd­jet­ten 362,3 mıllıon teńge bólingen. 150 oryn­dyq bala­baqshada 6 top jumys jasaıdy. 40-qa jýyq maman jumys isteıdi. Munda balalardyń oıyn jáne jatyn bólmeleri, mýzyka zaly, me­dı­­sınalyq bólme, ashana sapaly jıhazdarmen ja­raq­tandyrylǵan. Medısınalyq blogta dezın­feksııalyq quraldardy daıyndaıtyn jáne fızıo­terapevtik bólmeler ornalasqan. Balabaqsha ala­ńynda búldirshinderdiń bel­sendi qımyldaýyna ar­nal­ǵan kóleńkeli bas­tyrma, shaǵyn sáýlet nysan­dary ornatylǵan. Budan keıin qala basshysy oblys ortaly­ǵyndaǵy 11-shaǵyn aýdanda ornalasqan №49 «Dý­man» balabaqshasyna bardy. Memleket basshysy buryn balabaqsha ǵımaraty bolǵan nysandardy kúrdeli jóndeýden ótkizip, jas urpaqqa qaıtarýdy júktegen bolatyn. «Dýman» balabaqshasy osy tapsyrma negizinde ashylyp otyr. Kúrdeli jóndeýden keıin paıdalanýǵa berilip otyrǵan ǵımaratta №11 shaǵyn aýdanmen qatar, oǵan kórshiles orna­lasqan №12, «Máskeý» men «Bolashaq» shaǵyn aýdandarynyń da balalary tárbıelenetin bolady. 230 balaǵa arnalǵan balabaqshada 10 top bar. Jalpy alańy 3621,66 sharshy metr ǵımarattyń qurylysyna bıýdjetten 238247 myń teńge jumsalǵan. Qurylysty «Elıtstroıservıs» JShS júrgizgen. Qalalyq bilim bóliminiń basshysy Láz­zat Orazbaevanyń aıtýynsha, ótken jaz aıynda 7 myńǵa jýyq bala balabaqshamen qam­tylǵan, bıylǵy jyly 8 myń búldirshinge bala­baqshaǵa jol­dama beriledi. Sondaı-aq, taıaýda «Nur Aqtóbe» shaǵyn aýdanynda 320 oryndyq balabaqsha boı kóteredi dep kútilýde. Satybaldy SÁÝIRBAI, «Egemen Qazaqstan». Aqtóbe oblysy. Sýretti túsirgen Haıreden RAÝShANOV.