Energetıkter elektr qýatyn artyǵymen óndirýde

Aqsýdaǵy Eýrazııalyq Top (ERG) quramyna kiretin «Eýra­zııa­lyq energetıkalyq korporasııa» AQ-ta elektr stansasynyń osy jyldyń qańtar aıyna jos­parlanǵan elektr qýatyn óndirý mólsheri 1 mlrd. 422,7 mıllıon kVt/s qurady. Bul josparlanǵan kórsetkishten 32,7 mıllıon kVt/s artyq oryndalypty. Elektr qýatyn artyq shyǵarý stansa ónimin tutynýshylar arasyndaǵy suranystyń ósýine baılanysty. Elimizdiń alyp kásiporyndary – ERG quramyna kiretin «Qazhrom» TUK» AQ, «Qazaqstan elektrolız zaýyty», Sokolov-Sarybaı ken óndiristik birlestigi stansanyń basty tutynýshylary. – Sońǵy eki aıdyń ishinde stansadaǵy energobloktar toq­taý­syz jumys jasady. Qańtarda stansa belgilengen qýatyn 1912 MVt-ǵa deıin paıdalandy. Bul kór­set­kishke qol jetkizýge stansa jab­dyqtarynyń júıeli jańarty­lýy óz septigin tıgizdi, – deıdi stansanyń óndiristik-tehnıka­lyq bóliminiń basshysy Sergeı Manýılovıch. Bólim basshysy aıtqandaı-aq, Aqsý elektr stansasynda 2001 jyldan beri eskirgen jab­dyq­tardy jańartý jáne qaıta qurý baǵdarlamasy júzege asyrylýda. Qazirgi kúni stansanyń 8 energııa blogynyń 5 keshendi túrde jańarý men jańǵyrtylý júıeleri arqyly tolyqtaı jetildirýden ótti. Búgingi kúni №5 energııa blo­gynda quny shamamen 277 mıl­lıon dollar turatyn qaıta qurý jumystary júrgizilýde. 1996 jyldan bastap «EEK» AQ jab­dyqtardyń kúrdeliligi ártúr­li jóndeý jáne qaıta qurý ju­mystaryna 190 mlrd. teńge jum­sapty. Jalpy, stansada bel­gi­len­gen qýat kólemi 245 MVt quraıdy. Al kásiporynǵa qarasty «Shyǵys» kenishinde de eńbek ónimdiligin arttyratyn jańa tehnıkalar jumys jasaýda. Jýyrda kenishtiń tehnıkalyq parki MPL-150M1Ý jańa synamaly óńdeý mashınasymen tolyqty. Bul mehanızm kómirdi usaqtap, onyń synamasyn daıyndaý úshin zerthanada sapasyn anyqtaýǵa arnalǵan. Tehnıkanyń ónimdiligi – saǵatyna 2,2 tonna. Synamaly óńdeý mashınasy qatty otyn materıaldaryn usaqtaǵannan keıin zerthanaǵa jiberiledi. Jańa MPL-150M1Ý mashınasy untaqtaǵysh balǵadan, shómishti-shynjyrly konveıerden turady. Barlyq bólshekteri bir jerde jınastyrylǵan. Mashınany «DIK» kompanııasy jasaǵan, jańa tehnıkanyń quny 5 mıllıon teńgeni quraıdy. Ol arnaıy daıarlanǵan úlken ári jaryq bólmede ornatylǵan. – Zaman talabyna saı jabdyq bizdiń kómirdi usaqtaý kezindegi ýaqytymyzdy únemdeı túsedi. Eńbek ónimdiligi artady. Eski jab­dyqpen salystyrǵanda, kómir­di usaqtaý kezindegi shań-tozań­nyń paıda bolýy jańa jabdyq­tyń arqasynda azaıdy, – deıdi «Shyǵys» kenishiniń bas geolo­gy Bektas Smaqov. Bul kúnderi «Eýrazııalyq ener­getıkalyq korporasııa» AQ turaqty túrde óndiris tıimdiligin arttyrýda. Basty maqsaty – eńbek qaýip­sizdigin qamtamasyz ete otyryp, árqashanda alǵa umtylý. Kásip­orynǵa elimizde óndiriletin elek­tr energııasynyń 17 paıyzy jáne kómirdiń 20 paıyzy tıesili. Kásip­orynda 6 181 adam eńbek etýde. Farıda BYQAI, «Egemen Qazaqstan». Pavlodar oblysy, Aqsý qalasy.