«Teńizshevroıl» rekordtyq kórsetkishke qol jetkizdi

ALMATY. 10 aqpan. Taıaý kúnderi «Teńizshevroıl» jaýapkershiligi shekteýli seriktestik 2015 jyldy qorytyndylap, buqaralyq aqparat quraldaryna málimet taratty. Bul týraly egemen.kz tilshisi habarlady. «Teńizshevroıl» 2015 jyly munaı óndirý kólemin 27,16 mıllıon tonnaǵa jetkizgen (217 mıllıon barrel). Bul jańa rekordtyq kórsetkish bolyp esepteledi. Sol sııaqty ótken jyly «Teńizshevroıl» suıytylǵan gaz satý kólemin 1,27 mıllıon tonnadan asyryp, qurǵaq gaz satý kólemin 6,85 mıllıard tekshe metrge jetkizdi. Sondaı-aq, 2,7 mıllıon tonna kúkirt satty. Bul atalmysh kezeńdegi óndirilgen 2,4 mıllıon tonna kúkirttiń 113 paıyzyn quraıdy. «Teńizshevroıl» joǵary sapaly kúkirttiń úsh túrin kóptegen elderdegi satyp alýshylarǵa, onyń ishinde Qazaqstan Reseı, Ýkraına jáne Qytaı memleketterine, sonymen birge Jerorta teńizi basseıni men Atlant muhıty jaǵalaýy elderine ótkizedi. Qazirgi tańda «Teńizshevroıl» óndirilgen gazdyń 98 paıyzyn kádege jaratady.  Al 2015 jyly atmosferaǵa jiberilgen shyǵaryndylar kólemi óndirilgen munaıdyń bir tonnasyna shaqqanda, orta eseppen, 2,24 kılogramdy quraǵan. Qarjy kórsetkishterge keletin bolsaq, 2014 jyly Qazaqstan Respýblıkasyna tólengen tikeleı tólemderdiń mólsheri 14,7 mıllıard AQSh dollary bolsa, 2015 jyly atalǵan tólemder kólemi 8,2 mıllıard AQSh dollaryn qurady. «Teńizshevroıl» 2015 jyly qazaqstandyq taýarlar men qyzmetterdi paıdalanýǵa 2,4 mıllıard AQSh dollary shamasynda qarjy jumsaǵan. Qazirgi tańda jumys isteıtin qazaqstandyq qyzmetkerlerdiń úlesi 1993 jylǵy 50 paıyz kórsetkishpen salystyrǵanda 86 paıyzǵa ósti.  Al jergilikti ulttyq basshylardyń, orta býyn jetekshileriniń úlesi jalpy basshylyq quramnyń 74 paıyzyn quraıdy. Kadrlardy oqytý jáne shyńdaý jónindegi turaqty baǵdarlamany júzege asyrý nátıjesinde jaýapty basshylyq laýazymdarǵa taǵaıyndalǵan jergilikti qyzmetkerler qatary kóbeıe túsýde. Áleýmettik salaǵa úleste 2016 jyldyń «Igilik» erikti áleýmettik ınfraqurylym baǵdarlamasy bıýdjeti 25 mıllıon AQSh dollaryn quraıdy. Qarjynyń negizgi úlesi Atyraý oblysynda balabaqshalar, mektepter jáne basqa da áleýmettik nysandardyń qurylysyna jumsalady.  2016 jyly Atyraý oblysynyń densaýlyq saqtaý, bilim jáne oqytý salalarynyń sapasyn jaqsartýǵa kómektesý úshin «Teńizshevroıl» áleýmettik ınvestısııalar baǵdarlamasyna 1 mıllıon AQSh dollary shamasynda qarjy bólindi. «Teńizshevroıl» jaýapkershiligi shekteýli seriktestiginiń qazirgi kezdegi seriktesteri: «Shevron» – 50%, «QazMunaıGaz» AQ – 20%, «EksonMobıl Qazaqstan Venchýrs Ink.» – 25% jáne «LýkArko B.K.» – 5% bolyp tabylady. Aınash Esalı. Derek, sýret: egemen.kz.