ASTANA. 16 aqpan. Búgin Norvegııanyń Lıllehammer qalasynda ótip jatqan jasóspirimder arasyndaǵy II qysqy Olımpıada oıyndarynda Qazaqstan qorjynyna taǵy bir júlde tústi. Mánerlep syrǵanaýdan el namysyn qorǵaǵan Elızabet Tursynbaeva eki jattyǵý qorytyndysy boıynsha 167,88 upaı jıyp, qola medaldi moınyna taqty. Bul týraly egemen.kz tilshisi habarlady.
Olımpıada «altyny» 186,04 upaı jıǵan reseılik Polına Sýrskaıaǵa buıyrsa, kúmis júldege onyń otandasy Marııa Sotskovaıa qol jetkizdi. Marııanyń kórsetkishi – 169,50 upaı.
Birinshi jattyǵý – qysqa baǵdarlamadan keıin 16 jastaǵy Elızabet 59,11 upaımen ekinshi orynda turǵanyn atap ótken jón. Al birinshi orynda 60,87 upaımen japon qyzy Iýna Shıraıva turdy. Alaıda, erkin baǵdarlamada laıyqty óner kórsete almaǵan ol jalpy esepte 4-orynǵa taban tiredi.
Aıta keteıik, osymen Lıllehammerdegi jasóspirimder Oıynynda Qazaqstan sportshylary ekinshi qola medaldi qorjynǵa salyp otyr. Buǵan deıin bıatlonnan 6 shaqyrymdyq sprınttik jarysta synǵa túsken Arına Pantova da Olımpıadanyń qola júldegeri atanǵan bolatyn.
Elaman Qońyr.
Derek: egemen.kz.
Sýret: lillehammer2016.com.
