Jerebe tartý rásimi ótti

Keshe Astanada Ortalyq saılaý komıssııasy (OSK) saılaý bıýlletenine saıası partııalardyń ataýlaryn retimen engizý maqsatynda jerebe tartý sharasyn ótkizdi. Atalǵan rásimge Ortalyq saılaý komıssııasynyń tóraǵasy Qýandyq Turǵanqulov, OSK músheleri, «Nur Otan» partııasy Tóraǵasynyń birinshi orynbasary Asqar Myrzahmetov, «Aq jol» partııasynyń tóraǵasy Azat Perýashev, «Aýyl» partııasynyń hatshysy Bóribaı Jeksembın, QKHP saılaýaldy shtabynyń jetekshisi Aıqyn Qońyrov, JSDP saılaýaldy shtaby jetekshisiniń orynbasary Ashat Raqymjanov, «Birlik» partııasy saıası bıýrosynyń múshesi Roza Qýanyshbaeva jáne buqaralyq aqparat quraldarynyń ókilderi qatysty. Jerebe tartý rásimi Ortalyq saılaý komıssııasynyń «Saılaý bıýlletenine saıası partııalar ataýlaryn engizý týraly jerebe ótkizýdiń erejesin bekitý týraly» 1999 jyldyń 13 shildesindegi qaýlysymen belgilengen erejege sáıkes ótkizildi. Rásim barysynda OSK hatshysy Baqyt Meldeshov mólsheri jáne túsi boıynsha birdeı konvertterge partııalyq tizimderin Ortalyq saılaý komıssııasyna tirkegen partııalardyń sanyna teń, rettik nómirler belgilengen paraqshalardy saldy. Bul rette bir konvertte nómirlengen tek bir paraqsha ǵana boldy. Sodan keıin konvertter jelimdelip, aralastyryldy jáne barlyq qatysýshylar kóre alatyndaı qashyqtyqta ornalasqan ústel ústine jaıyldy. Odan ári saıası partııalardyń ókilderi partııalyq tizimderdiń tirkelý tártibi boıynsha kezekpen ústelden ózi tańdaǵan konvertti alyp, ony ashyp, paraqshadaǵy nómirdi jarııa etti. Sonymen, jerebege sáı­kes, saılaý bıýlletenine eń birin­shi «Nur Otan» partııasy engi­ziletin boldy. Nómirdi partııa Tóraǵasynyń birinshi orynbasary Asqar Myrzahmetov tańdaǵan-dy. Odan keıingilerdi retimen baıan­dar bolsaq, QKHP-ǵa ekinshi, «Aq jol» partııasyna úshinshi, «Birlik» partııasyna tórtinshi, JSDP-ǵa besinshi, «Aýyl» partııasyna altynshy nómir bu­ıyrdy. Naqtylaı aıtqanda, jerebe qorytyndysy boıynsha anyq­talǵandaı, 2016 jyldyń 20 naýryzynda daýys berýdi ótkizý kezinde saıası partııalardyń ataý­lary saılaý bıýlletenine myna tó­mendegideı tártippen engiziledi:

1. «Nur Otan» partııasy
2. Qazaqstan Kommýnıstik ha­lyq partııasy
3. «Aq jol» demokratııalyq par­tııasy
4. «Birlik» saıası partııasy
5. Jalpyulttyq sosıal-demo­kra­tııalyq partııasy
6. «Aýyl» halyqtyq-demo­kra­tııalyq patrıottyq partııasy

Joldybaı BAZAR, «Egemen Qazaqstan». Sýretti túsirgen Erlan OMAROV.