«Gornıak» – chempıon

Hromtaý qalasynda ótken 1999-2000 jyldary týǵan jasóspirimder arasyndaǵy dopty hokkeıden Qazaq­stan Respýblıkasynyń birinshiligi márege jetti. Dóń taý-ken baıytý kombınatynyń saýyqtyrý-dene­shynyqtyrý kesheninde tórt kún boıy elimizdiń óńirlerinen kelgen bes komanda el birinshiliginiń altyn júldesin sarapqa saldy. Osy keshenniń janyndaǵy dopty hokkeı seksııasynyń tárbıelenýshileri fınalda Oral qalasynyń komandasyn, 4:2 esebimen jeńip, el chempıony atandy. «Gornıak» komandasynyń alty oıynshysy elimizdiń qurama komandasyna shaqy­ryldy. Endi olar 17 jasqa deıingi jasóspirimder ara­syndaǵy Reseıdiń Arhan­gelsk qalasynda ótetin álem bi­rin­­shi­liginde el namysyn qor­ǵaı­tyn bolady. Olar – Azat Bekturǵanov, Ámir Qadyrjanov, Nıkıta Marýsıch, Andreı Semın, Talǵat Ramazan jáne Dmıtrıı Bodısh. – Bizdiń balalar óte jınaqy jáne sheber oınady. Qarsylastarymyz da osal emes. Shákirtterim, ásirese, fınalda ádemi oıyn órnegin kórsetti, – deıdi jattyqtyrýshy Amanserik Ustabaev. Dopty hokkeıden el birinshiligi Dóń taý-ken baıytý kombınaty saýyqtyrý-deneshynyqtyrý kesheni bazasynda 2008 jyldan beri ótkizilip keledi. Ústimizdegi jyly naýryz aıynda munda eń jas hokkeıshilerdiń arasynda el birinshiligin ótkizý kózdelýde. Kombınat dırektory Maral Bekeev dopty hokkeıden Qazaqstan chempıo­natyn Hromtaýda ótkizý dástúrge aınalǵanyn aıta kele, bul úrdistiń aldaǵy ýaqytta da jalǵasyn tabatynyna sendirdi. Satybaldy SÁÝIRBAI, «Egemen Qazaqstan». Aqtóbe oblysy.