Aqsýattaǵy alǵashqy jekemenshik balabaqsha

Taıaýda Aqsýat aýylynda «Ba­la­­­pan» baǵdarlamasy aıasynda «Aqbota» balabaqshasynyń jańa ǵımaraty paıdalanýǵa berildi. Jergilikti jas kásipker Oljas Qa­lızada ashqan jekemenshik balabaqsha 75 balaǵa arnalǵan. Jalpy, Tarbaǵataı aýdanynda balabaqshamen qamtýǵa aýyl ká­sipkerlerin tartý jumysta­ry joǵary deńgeıde júrgizilip jat­­qanyn baıqadyq. Bul rette memleket-jekemenshik áriptestigin damytý baǵdarlamasynyń bala­baqshaǵa jeke ınvestısııa salýǵa yqpal etip otyrǵanyn aıtqan ab­zal. Atalǵan joba aıasynda ǵı­marat salý jáne ony jabdyqtaý, jumysty ári qaraı júrgizý ká­sipkerge júktelse, balabaqsha qyzmetkerleriniń eńbekaqysy men kommýnaldyq shyǵyny mem­lekettik qazynadan tólenedi. Bul memleket pen kásipkerlerge de, ata-analarǵa da tıimdi. – Búldirshinderdi mektepke deıingi mekememen qamtý boıynsha Tarbaǵataı aýdany oblys kó­leminde alǵashqy orynda keledi. Sońǵy eki jyl kóleminde aýdanymyzda 25 balabaqsha ashylsa, onyń ishinde 13 jekemenshik balabaqsha paıdalanýǵa berildi. Elbasy Nursultan Nazarbaev­tyń tapsyrmasy boıynsha, mem­­leket-jekemenshik áriptestigin damytý aıasynda bıyl taǵy tórt balabaqsha salýdy kózdep otyrmyz. Iаǵnı, búldirshinderge arnalǵan jańa nysandar Qabanbaı, Tuǵyl, Qarǵyba, Mańyraq aýyldarynda boı kóteredi. Bul balabaqshalar búldirshinderimizdi tárbıelep qana qoımaı, jańa jumys oryndaryn ashýǵa da septigin tıgizip otyr, – dedi nysannyń ashylýymen quttyqtaǵan aýdan ákimi Dildábek Orazbaev. Sondaı-aq, jergilikti bıýdjet qarjysymen Seriktestik aýy­lyndaǵy balabaqshaǵa keńeıtý jumystary júrgizilip, Kóktúbek, Shorǵa eldi mekenderinde ja­ńa ba­labaqshalar ashylmaq. Osy arqyly tarbaǵataılyq búl­dir­shinderdi balabaqshamen qamtýdy tolyǵymen sheshý josparlanǵan. Aýdan ákimi saltanatty sharada Tursynhan Júnisov jáne Faý­zııa Rahımbaeva syndy aýyl arda­gerlerin «Eńbek ardageri» me­da­limen jáne jas kásipker Oljas Qalızadany Alǵys hatpen marapattady. Seksenniń seńgirinen asqan Faýzııa áje Aqsýatta 1938 jyly ashylǵan alǵashqy balabaqshanyń túlegi eken. 1936 jyly aýdan ortalyǵy Qyzylkesikten Aqsýat aýylyna kóshirildi. Eki jyldan keıin Jamal Toǵanasova esimdi apamyz Aqsýattaǵy qazirgi «Bereke» dúkeniniń ornyna tórt kıiz úı tigip, alǵashqy balabaqshany ashty. 1937 jyly birimizdiń ákemizdi, birimizdiń aǵa-baýyrlarymyzdy «úndemes» (NKVD) alyp ketip jatty. Sondaı qıyn kezeńde ata-anasyz qalǵan balalar bar, barlyǵy 20 shaqty sábıden quralǵan al­ǵash­­qy balabaqshany ashqan qaı­ratker apamyzdyń esimin bú­gingi urpaq umytpaýy tıis. Sol kıiz úılerdiń biri ashana, biri ul­dar­ǵa, biri qyzdarǵa arnalǵan jatyn bólme bolǵan edi. Ata-áje­lerimiz qandaı qıyndyq kórse de qajyrly qaıratymen sábılerdi qorǵansyz qaldyrǵan joq, dedi ótken jyldardy eske alǵan 81 jas­­­taǵy Faýzııa áje. Sondaı-aq, búgingi búldirshinderge beıbit hám baqytty ómir syılaǵan Elbasy saıa­satyn aıryqsha baǵalaıtynyn aıtty. «Jas kelse – iske». Biz aqsýat­tyq búldirshinderge qýanysh syılaǵan Oljasty áńgimege tartqan edik. Kásipker 2013 jyl­dyń qarasha aıynda ashylǵan balabaqshanyń alǵashqyda shaǵyn ǵımaratty jalǵa alǵanyn, keıin aýdan ákimdiginiń qoldaýymen qurylys júrgizgenin jetkizdi. «Damý» qory jáne «Ju­myspen qamtýdyń jol kartasy-2020» baǵdarlamasy arqyly 15 mıllıon teńge jeńildetilgen nesıe qarajatyna boı kótergen ǵımarattyń jalpy kólemi 550 sharshy metrdi quraıdy. Balabaqsha keń ári jaryq, búldirshinderdi tárbıeleýge arnalǵan zamanaýı qural-jabdyqpen tolyq qam­tylǵan. Kásipker 20 adamǵa jumys berip otyr. Olardyń qa­tarynda balalar dárigeri, psıholog jáne ádisker mamandar bar. Úsh topqa bólingen sábıler tórt ýaqyt ta­maq­tanady. – Balabaqshamyzdyń erek­sheligi, aptasyna alty kún jumys isteıdi. Áleýmettik baǵa retinde bir kúnge 350 teńge tólemaqy belgiledik. Balabaqshaǵa kelmeı qalǵan kúnder esepke alynbaı­tyndyqtan, ata-analarǵa da je­ńil. Sondaı-aq, úshtuǵyrly til baǵdarlamasy sheńberinde aǵyl­shyn, orys tilderin úıretemiz. Aldaǵy ýaqytta arnaıy kólikpen balalardy ózimiz tasymaldaýdy josparlap otyrmyz, – dedi ol. Dýman ANASh, «Egemen Qazaqstan». Shyǵys Qazaqstan oblysy, Tarbaǵataı aýdany.