«Gúl-ápshe» qalaı plagıat bolyp shyqty?

Bul kúnde qazaq estrada­synyń qudaıy berip-aq tur: ómirge birinen soń biri as­pan­nan jaýǵan quıryqty jul­dyzdaı hıt ánder kelip jatyr. Bulardyń qataryna «Alaý» tobynyń oryndaýyndaǵy «Gúl-ápsheni» de qosýǵa bolar ma edi?! «Alaý» tobynyń prodıý­seri Baıan Esentaeva óziniń ınter­nettegi paraqshasynda qýanyshy qoınyna syımaı: «Bizdiń jańa dúnıeni qarsy alyńyzdar!», – dep jar salǵany este. Endi myna qyzyqty qarańyz: «Alaýdyń» beıneklıpin jaınatyp, jarnamasyn jalaýlatyp aıtqan «Gúl-ápshesi» bar bolǵany rýmynnyń Sanie cu zurgălăi («Sanı s býbensamı») degen ániniń kóshirmesi, ıaǵnı plagıat bolyp shyqqan. Sol baıaǵy kóńildi jelpintetin oına­qy áýen, skrıpkanyń quıqyl­jyǵan erke sazy, tipti «Heı!» dep qysqa qaıyryp aıǵaı salatyn jeri – bár-bári ǵaıyptan taıyp «Gúl-ápshege» qonys aýdarypty. Tek rýmyn tilinde án qys pen shana týraly bolsa, qazaqshadaǵy keıipker – «krasavısa vapshe» eken. Jalpy, bul án Qaraǵan­dydaǵy «Dakııa» rýmyn má­denı birlestiginiń janyn­daǵy «Dorule» etno-folklor­lyq an­sambliniń repertýarynda da bar. Biraq ta, qara­ǵandylyq rý­myndardyń Baıan Esentaevadan bir aıyr­ma­­shylyǵy – álgi ándi Rýmy­nııa­daǵy Ro-Mania tobynyń kóshbasshysy Ionýs Voıký degen quqyq ıesinen resmı túrde ruqsat alyp, qoǵamdyq negizde oryndaıdy eken. Al «Alaý» bolsa, osy ánmen mal taýyp júrgen kommersııalyq joba... – Kezinde, – deıdi «Dakııa­nyń» tóraǵasy Nıkolaı Plýsh­kıs, – Bul ándi áıgili Edıt Pıaf ta oryndaǵan. Ol da zamanynda ándi óziniki qylyp kórsetpek bolypty. Alaıda, 1936 jyly avtorlyq quqyq jónindegi sotta jeńilip qalyp, osy ándi qansha oryndady – avtoryna sonsha aqy tólep otyrǵan. Sóıtip, ýaqyttyń talabyna saı jasaryp, jańarǵan hıt ándi Ro-Mania toby Rýmynııa avtorlyq quqyq odaǵynda resmı túrde tirketip alǵan. Rýmyndardyń renjıtin jóni bar. Aıdyń-kúnniń amanynda halqynyń súıiktisine aınalǵan áıgili ánniń taǵdyry tálkekke túsken. Degenmen, qazaqtyń sýyn iship, nanyn jep júrgen rýmyn baýyrlar sabyr saqtap otyr. Qaırat ÁBILDINOV, «Egemen Qazaqstan». QARAǴANDY.