Qyzylordada joǵalǵan balalar tabyldy

QYZYLORDA. 1 naýryz. Qyzylordalyq polısııa qyzmetkerleriniń qyraǵy jumystarynyń nátıjesinde joǵalyp ketken búldirshin men úıinen shyǵyp ketip, qaıta oralmaǵan jasóspirim din aman tabyldy. Bul týraly oblystyq ishki ister basqarmasynyń baspasóz qyzmetine silteme jasaǵan egemen.kz tilshisi habarlady. Bıylǵy jyldyń 29 aqpanynda saǵat 20.30 shamasynda oblystyq ishki ister departamentiniń jedel josparlaý basqarmasyna 2013 jyly týǵan balanyń joǵalyp ketkendigi jaıly habarlama kelip túsedi. Atalǵan habarlama boıynsha shuǵyl oqıǵa ornyna departamenttiń jáne qalalyq ishki ister basqarmasynyń jedel tergeý toby, jergilikti polısııa qyzmetiniń ýchaskelik polısııa jáne jol-patrýldik polısııa qyzmetkerleri jiberilip, tótenshe jaǵdaılar departamentine habarlandy. Búldirshinniń joǵalyp ketý sebebin anyqtaý maqsatynda tıisti sharalar júrgizilip, izdestirý jumystaryna quzyrly ishki ister organdary qyzmetkerleri jumyldyryldy. Birneshe saǵatqa sozylǵan sharalar barysynda sol aýmaqtaǵy kóp qabatty turǵyn úılerdiń ójireleri, podezderi, aıaqtalmaǵan qurylys nysandary, saıajaı aýmaǵyndaǵy dalalyq eldi mekender tekserilip, kórgen-bilgen adamdardan jaýaptar alyndy. Atalǵan faktige sebep bolarlyq jaıttar, barlyq boljamdar jan-jaqty qaraldy. Nátıjesinde, 3 jastaǵy búldirshin Tasbóget kenti, PMK-19 saıajaıynyń batys jaǵynan 4 shaqyrym qashyqtyqtaǵy jyńǵyldar arasynda uıyqtap jatqan jerinen tabyldy. Sonymen qatar, kezekshi bólimge birneshe saǵattan keıin taǵy bir jasóspirimniń joǵalyp ketýi jaıly derek tirkeledi. Naqty aıtsaq, 29 aqpan kúni saǵat 21.30 shamasynda 2002 jyly týǵan 8-synyp oqýshysy Tasbóget kentinde turatyn ájesiniń úıinen shyǵyp ketip, qaıta oralmaıdy. Saǵat 01.30 shamasynda anasy qyzynyń joǵalyp ketkendigi jaıly departamenttiń kezekshi bólimshesine shaǵymdanady. Atalǵan habarlama boıynsha, jedel túrde izdestirý sharalary júrgizilip, jasóspirimnyń turpattyq beınesi, erekshe belgileri jasalady. Úıden ketip qalýyna sebep bolarlyq jaıttar jan-jaqty qaralyp, barýy múmkin oryndar tekserildi, qurbylary men dostarynan túsiniktemeler alyndy. Polısııa qyzmetkerleriniń júrgizgen izdestirý sharalarynyń nátıjesinde 14 jasar jasóspirim qyz birneshe saǵattan keıin tabyldy. Erjan Baıtiles. Derek, sýret: egemen.kz.