Saılaý ádil de adal ótedi

Qyzylorda oblystyq saılaý komıssııasynda barlyq deńgeıdegi máslıhattar depýtattyǵyna kandıdattardy tirkeýdiń qorytyndysyn, kandıdattar men saıası partııalardyń úgit jumystaryn júrgizýdiń sharttary men tártibin jarııalaý jáne saıası partııalardyń oblystyq fılıaldarynyń ókilderimen taza saılaý memorandýmyna qol qoıýy rásimi ótti. Jalpy, oblysta máslıhat depýtat­ty­ǵyna usynylǵan 498 úmitkerdiń 464-i okrýg­tik saılaý komıssııalarynyń sheshimimen tirkeldi. Al 32 kandıdat óz ótinishterin qaı­taryp aldy, 2 úmitker qujat­taryn túgel tapsyrmaýyna baılanysty okrýgtik saılaý komıssııalary olardy tirkeýden bas tartqan. Bul degenińiz, aımaq boıynsha 1 man­datqa 4 kandıdat básekeles bolyp tur degen sóz. Onyń ishinde 86 adam ob­lystyq más­lıhatqa tirkelgen. Olardyń ortasha jasy – 49. 316 azamat aýdandyq máslı­hat­tarǵa úmitker sanalady. Bulardyń ortasha jasy – 45. Al 62 úmitker qalalyq más­lıhatqa tir­keldi, ortasha ja­sy – 42. О́ńirdegi eń jas – 22 jas­taǵy jáne eń egde – 69 jasta­ǵy kandıdattar Jańa­qorǵan aýdandyq máslı­hatynyń depýtattyǵyna úmitker. Tirkelgen 396 kandıdat joǵary bilimdi, olardyń ishinde 137 muǵalim, 93 ınjener, 41 ekonomıst, 24 zań­ger, 14 dáriger, 14 aýyl sharýa­shylyǵy salasynyń mamany, 73 ózge salanyń mamandary bar. 50 kandıdattyń arnaýly orta, 18 kandıdattyń orta bilimi bar. Úmitkerlerdiń 52,6 paıy­zy memlekettik organdar men uıymdardyń qyzmet­ker­leri bolsa, 39 paıyzy kom­mersııalyq qury­lym­darda jumys atqarady, 2,4 paıy­zy saıası partııalar men qoǵam­dyq birlestikterdiń qyzmet­kerleri, 9 kandıdat ýaqytsha jumyssyz jáne 19 kandıdat ózge salalarda qyzmet atqarady. Barlyq tirkelgen kandı­dat­tardyń 343-i ózin-ózi usyný jolymen jáne 148-i saıası partııalardan usynylǵan. Kandıdattardyń 1-ýi par­tııaǵa múshe­ligin kór­setpegen, 146 kandıdat «Nur Otan» partııasynyń múshesi, «Aýyl» partııasynan – 3, «Aq jol» partııasynan – 1, QKHP-dan 2 úmitker. Al 311 úmitker partııada joq. Usynylǵan kan­dı­dat­tar­dyń 463-i – qazaq, 1 koreı ultynan. Ákimdikter aýmaqtyq saı­laý komıssııalarymen bir­lesip úgit baspa materıal­daryn ornalastyratyn oryndardy belgilegen jáne ony jaraqtandyrý máseleleri she­shilgen. 26 aqpandaǵy jaǵdaı bo­ıyn­sha saılaý komıssııalarynda barlyq deńgeıdegi máslı­hattardyń depýtattyǵyna kandıdattardyń 4739 senim bildirilgen adamy, saıası par­tııalardyń 1050 senim bildi­rilgen adamy tirkelgen. Árbir saıası partııa Qyzylorda oblysy boıynsha 350 saılaý ýchas­kesine shaqqanda 1050 senim bildirilgen adamǵa deıin tir­ketýge quqyǵy bar. «Nur Otan» partııasynyń oblystyq fılıaly adal saılaý týraly kelisim ázirlep, saıa­sı partııalardyń jergilikti ókilderine qol qoıýǵa usyndy. Oblystyq saılaý komıssııasy atalǵan bastamany qoldady. Memorandýmmen tanysyp shyqqan ózge saıası partııalar fılıaldarynyń basshylary da qoldap qol qoıdy. Erjan BAITILES, «Egemen Qazaqstan». QYZYLORDA.