Elbasy Ábilseıt Aıhanovtyń týystaryna kóńil aıtý jedelhatyn joldady

ASTANA. 7 naýryz. Memleket basshysy dańqty palýan, erkin kúrestiń maıtalmany Ábilseıit Aıhanovtyń qaıtys bolýyna baılanysty marqumnyń jaqyndary men týystaryna kóńil aıtý jedelhatyn joldady. Bul týraly akorda.kz-ke silteme jasaǵan egemen.kz tilshisi habarlady. Prezıdent aty ańyzǵa aınalǵan palýan Ábilseıit Aıhanovtyń Qazaqstan halqynyń maqtanyshy bolǵanyn ataı otyryp, kóńil aıtty. «Ol burynǵy Keńes Odaǵynyń aýqymynda ǵana emes, kóptegen halyqaralyq jarystarda jeńimpaz ataný arqyly zor jetistikterge qol jetkizgen asa úlken daryn ıesi edi. Ábilseıit Aıhanov óz jeńisteri arqyly halqymyzdyń rýhyn kóterip, jastardyń sporttyń osy túrimen aınalysýyna yqpal etti. Kóptegen jas oǵan eliktep salamatty ómir saltyn ustanýǵa, qajyrly, qaıratty bolyp ósýge talpyndy. Bilikti bapker retinde de kóptegen dańqty sportshylardy tárbıelep, ósirdi. Sporttaǵy jetistikteri úshin qurmetti ataqtar men marapattarǵa ıe boldy», – delingen jedelhatta. Sońynda Nursultan Nazarbaev Ábilseıit Aıhanovtyń esimi men eńbegin qazaqstandyqtar umytpaıtynyn atap ótti. Talǵat Raıymbek. Derek, sýret: akorda.kz.