Maslenısany shyǵaryp saldy

Qaraǵandy qalasyndaǵy Kenshilerdiń mádenıet saraıynyń aldynda slavıan halyqtarynyń dástúrli Maslenısa merekesi sán-saltanatpen atap ótildi. Qar aralas jańbyr jaýyp, kún raıynyń kúrt buzylǵanyna qaramastan, qala turǵyndary kóktemdi qarsy alatyn kóp meıramdardyń birin qarasy seldiremeı tamashalady. Qaraǵandydaǵy Maslenısa meıramyn jergilikti «Kazachıa volnısa» qoǵamdyq birlestigi uıymdastyrdy. Birlestiktiń tóraǵasy Semen Rakovtyń aıtýynsha, Maslenısa merekesin bu­lar osymen segizinshi ret uıym­dastyryp otyr eken. «Áýelde bul mereke kenshiler astanasyndaǵy ortalyq saıabaqta ótip keldi. Al endi osymen tórtinshi ret qalanyń qaq ortasynda, Kenshilerdiń mádenıet saraıynyń aldynda toılaýdy dástúrge aınaldyrdyq. Bizder, qazaqstandyqtar – bir­tutas halyqpyz. Sodan da bolar, Maslenısa merekesin atap ótý­ge qalamyzdaǵy etnomádenı birles­tikterdiń biri qalmaı atsalysty», – dedi Semen Rakov. Maslenısa kóz­degen maq­saty­na jetti. «Kazachıa volnısa» qoǵam­dyq birles­tigi uıym­das­tyrǵan konsert­tik baǵdarlama, túrli oıyndar, sporttyq sharalar men baı­qaýlar jurttyń kóńilinen shyqty. Merekege, jo­ǵaryda aı­tyl­ǵanyn­daı, qala­myzdaǵy basqa da etno­mádenı bir­les­tikterdiń ókil­deri qatysyp, toı-dýmannyń kóri­gin qyzdyra tústi. Túrli ult pen ulystyń balalary bir-birin kók­tem merekesimen quttyqtap, aqja­r­­ma tilekterdiń tıegin aǵytty. Bas­qa­nyń toıy ǵoı dep syrttan baǵyp tur­maı, or­taq qýanyshtyń ústinde bir­ligi jaras­qan eldiń balasy eken­digin kórse­tip, óz ónerlerin ortaǵa saldy. Maslenısa merekesiniń ataqty quımaqsyz ótpeıtini belgili. Bul jolǵy merekede qoǵamdyq birlestiktiń belsendileri eki myńǵa tarta quımaq pisirip, halaıyqqa usyndy. Dámi til úıirgen quımaqtar kózdi ashyp-jumǵansha qoldan-qolǵa tarap ketti. Merekeniń sońyna taman dástúrli túrde Maslenısanyń samannan jasalǵan tulyby órtendi. Bul sharanyń da ózindik mán-maǵynasy bar: eski-qusqynyń, kir-qoqystyń bári kelmeske ketip, onyń ornyn tirshiliktiń jańa óskini basý kerek degendi bildiretin yrym bolsa kerek. Iаǵnı, bul – taǵy bir kóktem kelip, túrli ulttyń balasy tatý-tátti turyp jatqan ortaq úıimizdiń qaqpasyn jańa úmitpen jadyraı qaqty degen sóz. Qaırat ÁBILDINOV, «Egemen Qazaqstan». QARAǴANDY.